सातारा:  आमदार श्रीमंत छ. शिवेंद्रसिंहराजे भोसले यांच्या वाढदिवसाचे औचित्य साधून अमॅच्युअर सायकलींग असोशिएशन ऑफ सातारा आणि आमदार शिवेंद्रसिंहराजे भोसले मित्रसमुहाच्यावतीने मंगळवारी सातारा ते मेढा, महाबळेश्वर आणि महाबळेश्वरहून पाचगणी, वाई मार्गे पुन्हा सातारा या साता-यातील पहिल्याच राष्ट्रीय साहसी सायकल स्पर्धेचे आयोजन करण्यात आले होते. या स्पर्धेच्या निमित्ताने सातारकरांनी सायकल स्पर्धेचा थरार अनुभवला. दरम्यान सातारा ते मेढा या मार्गावरील स्पर्धेत आमदार शिवेंद्रसिंहराजे भोसले, सौ. वेदांतिकाराजे भोसले आणि रुदनीलराजे भोसले सहभागी झाल्याने स्पर्धकांमध्ये उत्साहाचे वातावरण होते.  स्पर्धेत घाटाचा राजा हा किताब अरविंद पनवर यांनी पटकावला. 

महाराष्ट्र राज्य सायकलींग असोशिएशनचे उपाध्यक्ष अविनाश कदम यांच्या नियोजनातून सोमवारीच राष्ट्रीय साहसी सायकल स्पर्धेची तयारी पूर्ण झाली होती. मंगळवारी सकाळी 6 वाजता साता-यातील छत्रपती शाहू क्रीडा संकुल येथून स्पर्धेस आमदार श्री.छ. शिवेंद्रसिंहराजे भोसले आणि उद्योजक अजित मुथा आणि मान्यवरांच्या उपस्थितीत प्रारंभ झाला.  स्पर्धेसाठी सातारा ते मेढा, महाबळेश्वर आणि महाबळेश्वरहून पाचगणी, वाई मार्गे पुन्हा सातारा असे तीन मार्ग होते. स्पर्धेत देशाच्या विविध भागातील जवळजवळ 300 सायकलस्वार सहभागी झाले होते. सातारा पासून महाबळेश्वर, पाचगणी मार्गे वाई शहरातून पुन्हा सातारा असा अवघड ट्रॅक सायकलपटूंना पार करावयाचा होता. परंतु नैसर्गिक वातावरण आणि स्थानिकांचा उत्साह आणि पाठिंब्यामुळे अनेक सायकलपटूंना तो सुसहय झाला. महाबळेश्वरच्या डोंगरद-या पार करताना सायकलपटूचा चांगलाच कस लागला.

सातारा ते मेढा या मार्गावर स्थानिक स्पर्धक मोठया संख्येने सहभागी झाले होते. या मार्गावर आमदार शिवेंद्रसिंहराजे भोसले, सौ. वेदांतिकाराजे भोसले, रुदनीलराजे भोसले हे सहभागी झाले होते. त्यांच्या सहभागामुळे स्पर्धकांमध्ये उत्साहाचे वातावरण होते. स्पर्धा मार्गालगतच्या प्रत्येक गावातील ग्रामस्थांनी ढोल ताशांच्या गजरात स्पर्धेत सहभागी खेळाडूंचा उत्साह वाढवला.  सातारा येथील छ. शाहू जिल्हा क्रीडा संकुलातून स्पर्धेला सुरुवात झाली. या राष्ट्रीय स्पर्धेचा समारोप कुपर कॉलनी कदम बाग, येथे झाला. तसेच हौशी स्पर्धकांसाठी होणा-या सातारा ते मेढा या सायकलींग स्पर्धा ठेवण्यात आली होती. त्यात सातारकर मोठया संख्येने सहभागी झाले होते. त्यात अव्दैत दिक्षित (पुणे), धैर्यशील पाटील (सातारा), डॉ. प्रतिक भोईटे (रा. फलटण) यांनी पहिले तीन क्रमांक पटकावले. सातारा ते महाबळेश्वर या मार्गासाठी अरविंद पनवर, मनोहर लाल, अनिल मंगलो यांनी तर सातारा ते महाबळेश्वर आणि वाई मार्गे पुन्हा सातारा या मार्गावर दिनेश कुंभार, बजरंग डेलू, गणेश पवार यांनी क्रमांक पटकावले.

घाटाचा राजा हा किताब अरविंद पनवर यांनी पटकावला. विजेत्यांना एकूण 6 लाख 66 हजारांची बक्षीसे देण्यात आली. सातारा मेढा सातारा पहिल्या 3 क्रमांकाना चषक देण्यात आले व स्पर्धा पूर्ण करणाऱ्या प्रत्येकला मेडल देण्यात आले व स्पर्धा पूर्ण करणाऱ्यातून लकी ड्रॉ काढून 3 रेसर सायकल भेट देण्यात आल्या.  या स्पर्धेसाठी जिल्हा पोलीस दल आणि जिल्हा क्रीडा अधिकारी यांचे सहकार्य लाभले.  स्पर्धा यशस्वी होण्यासाठी महाराष्ट्र राज्य सायकलींग असोशिएशनचे उपाध्यक्ष अविनाश कदम आमदार शिवेंद्रसिंहराजे भोसले मित्र समूह आणि त्यांच्या सहका-यांनी प्रयत्न केले. पारितोषिकांचे वितरण आमदार श्री.छ. शिवेंद्रसिंहराजे भोसले, आशियाई सायकलिंग फेडरेशन चे सेक्रेटरी ओंकार सिंग, नॅशनल सायकलिंग फेडरेशन ऑफ इंडिया सेक्रेटरी व्ही.एन. सिंग, नॅशनल सायकलिंग असो.सहसेक्रेटरी गजेन गानला, सायकलिंग असो.महाराष्ट्र प्रताप जाधव, सायकलिंग असो.महाराष्ट्र चे आजीव सदस्य विजय जाधव व नॅशनल सायकलिंग असो.चे सर्व सदस्य आणि मान्यवरांच्या उपस्थितीत करण्यात आले.

 या स्पर्धेत एक गरीब सायकल पटू जो साधी सायकल घेऊन सहभागी झाला होता. त्याने 110 कि.मीची स्पर्था पूर्ण करून योग्य वेळेत आल्य बद्दल त्याला रुपये 40 हजार किमतीची रेसर सायकल क्वालिटी ग्रुपच्या वतीने भेट देण्यात आली. तर साताऱ्यातील सायकल पटू विनीत कुलकर्णी यांनी सध्या सायकल वरून 55 किमी ची सातारा- मेढा-सातारा ही स्पर्धा पूर्ण केली.

 स्पर्धा यशस्वी करण्यात पोलिसांचा सिंहाचा वाटा

साता-यातील ही राष्ट्रीय साहसी स्पर्धा यशस्वी करण्यात  पोलीस अधीक्षक संदीप पाटील आणि त्यांच्या सहका-यांचा सिंहाचा वाटा असून त्यामुळेच स्पर्धा उत्कृष्टरित्या पार पडली असे महाराष्ट्र राज्य सायकलींग असोशिएशनचे उपाध्यक्ष अविनाश कदम यांनी सांगितले.