मुंबई : राज्य सरकारने शेतकऱ्यांना जाहीर केलेल्या सरसकट दीड लाख रुपयांच्या कर्जमाफीचा लाभ सर्व पात्र शेतकऱ्यांना घेता यावा, यासाठी छत्रपती शिवाजी महाराज शेतकरी सन्मान योजनेसाठी शेतकऱ्यांना अर्ज भरण्याच्या मुदतीमध्ये १ मे २०१८ पर्यंत आणखी मुदतवाढ देण्यात आली आहे. काही कारणास्तव ज्या शेतकऱ्यांना अर्ज करता आले नाही, त्यांच्यासाठी कर्जमाफीच्या योजनेसाठी अर्ज करण्याची यापूर्वी १४ एप्रिल ही अंतिम तारीख होती. 

राज्य सरकारने जाहीर केलेल्या कर्जमाफी योजनेस पात्र शेतकऱ्यांना काही तांत्रिक कारणास्तव अथवा कागदपत्रांच्या त्रुटीमुळे मुदतीत अर्ज करता आले नव्हते. मात्र, पात्र असूनही कोणताही शेतकरी या योजनापासून वंचित राहू नये म्हणून पुन्हा एकदा १ मे २०१८ पर्यंत मुदतवाढ देण्याचा निर्णय मुख्यमंत्री देवेंद्र फडणवीस यांनी नागपूर येथे नुकताच जाहीर केला. मुख्यमंत्र्यांच्या या निर्णयामुळे वंचित राहिलेले पात्र शेतकरी अर्ज करू शकणार आहेत. शेतकऱ्यांच्या कर्जासाठी वन टाइम सेटेलमेंट योजनेसाठी यापूर्वीच ३० जून २०१८ पर्यंत मुदत देण्यात आली आहे, असे सांगण्यात आले.