पुणे : जानेवारीच्या दोन आठवड्यांमध्ये वाढलेल्या थंडीमुळे 'स्वाइन फ्लू'चे विषाणू सक्रिय झाले आहे. त्यामुळे पुण्यासह शिर्डीतील तिघांचा खासगी रुग्णालयात मृत्यू झाला. त्यामध्ये एका आठ वर्षीय मुलाचा समावेश आहे. नव्या वर्षाच्या सुरुवातीलाच नव्याने चौघांना विषाणूची लागण झाली आहे.

धायरी येथील आठ वर्षाच्या मुलाला स्वाइन फ्लूची लागण झाली. त्याच्यावर उपचार सुरू होते. मात्र, प्रकृतीत फारसा फरक न पडल्याने त्याला पाच जानेवारीला रुबी हॉस्पिटलमध्ये दाखल कऱण्यात आले. त्याला जन्मतः थॅलेसेमियाचा आजार होता. त्याचे बोन मॅरो ट्रान्सप्लांटही झाले होते. थॅलेसेमियाच्या आजारामुळे प्रतिकारशक्ती कमी झाली होती. त्यामुळे प्रकृती खालावली आणि तो दगावला. कोंढव्यातील ४६ वर्षीय महिलेला ताप, सर्दी, खोकला, थंडी अशी लक्षणे दिसत होती. तसेच, श्वास घ्यायलाही त्रास होत होता. त्यामुळे तात्पुरते उपचार घेतले. मात्र, प्रकृती खालावल्याने तीन जानेवारीला रुबी हॉस्पिटलमध्ये दाखल करण्यात आले. उपचारादरम्यान त्या अकरा जानेवारीला दगावल्या. शिर्डी येथील ५४ वर्षीय इसमाला ताप, सर्दी, खोकल्याची लक्षणे आढळून आल्याने त्यांना उपचारासाठी वानवडीतील रुबी हॉस्पिटलमध्ये २५ डिसेंबरला दाखल करण्यात आले. त्यांच्यावरही उपचार सुरू होते. मात्र, १५ जानेवारीला त्यांचा स्वाइन फ्लूमुळे मृत्यू झाल्याची माहिती आरोग्य विभागाने दिली. 

नव्या वर्षात आतापर्यंत स्वाइन फ्लूने तिघांचा बळी घेतल्याची नोंद करण्यात आली आहे. गेल्या वर्षात ६२ जणांचा मृत्यू झाला होता, तर ५९२ जणांना लागण झाली होती. नव्या वर्षात आतापर्यंत ४७ हजार ३८२ जणांची तपासणी करण्यात आली असून, पैकी चौघांना लागण झाली आहे. 

डिसेंबरच्या शेवटी आणि जानेवारीच्या पहिल्या दहा दिवसात चांगलीच थंडी होती. हे वातावरण स्वाइन फ्लूच्या विषाणूंसाठी पोषक असते. त्यातच तापमान बदलत गेले आणि त्याचा परिणाम म्हणून स्वाइन फ्लूचा संसर्ग वाढण्याची शक्यता आहे. नव्या वर्षात तीन मृत्यू झाले असून, चौघांना लागण झाली आहे. 

-डॉ. संजीव वावरे, सहायक आरोग्य प्रमुख