पुणे : पोलादपूर येथील आंबेनळी घाटात बस कोसळून दापोली कृषी विद्यापीठातील 30 कर्मचाऱ्यांचा झालेला अपघाती मृत्यू हा अत्यंत दुर्दैवी आणि क्लेशदायक असून अशा घटना रोखण्यासाठी महाराष्ट्रातील घाट रस्ते सुरक्षित करण्यासाठी सार्वजनिक बांधकाम विभागाने तातडीने व गांभीर्याने पावले उचलावीत अशी आग्रही मागणी खासदार अमर साबळे यांनी केली आहे.

पोलादपूर येथील आंबेनळी घाटात शनिवारी (दि.28 जुलै) बस कोसळून झालेल्या अपघातात 30 जणांचा मृत्यू झाला. या घटनेने संपूर्ण महाराष्ट्र शोकाकुल झाला आहे. त्या पार्श्वभूमीवर खासदार अमर साबळे यांनी अपघातातील मृतात्म्यांना श्रद्धांजली अर्पण केली. यासंदर्भात त्यांनी आपल्या भावना व्यक्त केल्या.

ते म्हणाले की, ही अपघाताची घटना अतिशय दुर्दैवी आणि धक्कादायक आहे. मात्र या घटनेमुळे राज्यातील घाट रस्त्यांच्या सुरक्षिततेचा मुद्दा उपस्थित झाला आहे. महाराष्ट्रातील कोकण, पश्चिम महाराष्ट्र या विभागांसह सर्वच विभागात लहान-मोठे असे शेकडो घाट रस्ते आहेत. हे घाट वळणावळणाचे आणि अरुंद असतात. तसेच अनेक ठिकाणी पावसामुळे वाहून येणाऱ्या मातीमुळे हे रस्ते निसरडे होतात. अनेक ठिकाणी भक्कम कठडेही उभारलेले नसतात. त्यामुळे या घाट रस्त्यांवर बहुतांश वेळा अपघाताच्या घटना घडत असतात.

महाराष्ट्रातील सर्वच घाट रस्त्यांवर सुरक्षिततेच्या दृष्टिकोनातून सार्वजनिक बांधकाम विभागाने अपघातप्रतिबंधक तंत्रज्ञानाच्या सहाय्याने घाट रस्ते सुरक्षित केले पाहिजेत. स्थानिक प्रशासन आणि पोलीस प्रशासनानेही घाट परिसरातील मानवनिर्मित अडथळे दूर करावेत. तसेच या ठिकाणी कायमस्वरूपी सुसज्ज सुरक्षा पथक तैनात करण्यात यावी, अशी मागणी खासदार अमर साबळे यांनी केली आहे.