सातारा : पुणे पदवीधर मतदारसंघातील मनसेच्या उमेदवार रुपाली ठोंबरे-पाटील यांना भ्रमणध्वनीवरुन एका व्यक्तीने ‘आमदार होण्याचा प्रयत्न करु नकोस, पुण्यात तू जिथे असशील तिथे संपवून टाकीन’, अशी धमकी दिली होती. या धमकीचे पडसाद सातार्‍यात उमटले असून मनसे विद्यार्थी व एसटी कामगार सेनेचे जिल्हाध्यक्ष युवराज पवार यांनी त्या धमकी देणार्‍या विकृताला दिसेले तिथे ठोकणार असल्याचा इशारा दिला असून भ्रमणध्वनीवरुन धमकी देवून सातारा जिल्ह्याला बदनाम करु पाहणार्‍याला त्याची जागा दाखवणार असल्याचेही सांगितले आहे.
याबाबत माहिती अशी की, सध्या पुणे पदवीधर मतदारसंघ तसेच शिक्षक मतदारसंघाच्या उमेदवारांचा निवडणूक प्रचार टीपेला पोहोचला आहे. आरोप-प्रत्यारोपांमुळे पश्‍चिम महाराष्ट्रातील वातावरण ढवळून निघाले आहे. अशातच महाराष्ट्र नवनिर्माण सेनेच्या पुणे पदवीधर मतदारसंघाच्या उमेदवार रुपाली ठोंबरे-पाटील यांना भ्रमणध्वनीवरुन लबाडे या व्यक्तीने ‘आमदार होण्याचा प्रयत्न करु नकोस, पुण्यात तू जिथे असशील तिथे संपवून टाकीन’, अशी धमकी दिल्याने आज एकच खळबळ उडाली. एका महिला उमेदवाराला अशा पद्धतीने भ्रमणध्वनीवरुन धमकी देण्यात आल्याने सातारा जिल्ह्यातील मनसे सैनिकांमध्ये प्रक्षुब्धतेचे वातावरण निर्माण झाले असून या पार्श्‍वभूमीवर मनसे विद्यार्थी व एसटी कामगार सेनेचे जिल्हाध्यक्ष युवराज पवार यांनी याबाबत व्हिडिओ क्लिपद्वारे लबाडे नावाच्या धमकी देणार्‍या व्यक्तीचा आम्ही युद्धपातळीवर शोध घेत असून त्याने फोन स्विच ऑफ केला असला तरी त्याला आकाश-पाताळ एक करुन, शोधून त्याला ठोकणार असल्याचा इशारा दिला असून फोनच्या माध्यमातून एका महिलेला जिवे मारण्याची धमकी देवून सातारा जिल्ह्याचे नाव बदनाम करु पाहणार्‍या ‘त्या’ विकृताला त्याची जागा दाखवणार असल्याचा इशारा युवराज पवार यांनी दिला आहे. संबंधित घटना ही पुण्यात घडल्याने त्याचा तपास पुणे पोलिसांकडे जरी असला तरी आम्ही आमच्या पद्धतीने आमचा तपास सुरुच ठेवणार असून मनसैनिकांना नडणार्‍यांना सातार्‍यातील मनसैनिक कशापद्धतीने दणका देतात, हे संपूर्ण महाराष्ट्र लवकरच पाहणार आहे. तत्पूर्वी पुणे मतदारसंघातून रुपाली ठोंबरे-पाटील यांचे पारडे जड असून त्यांचाच विजय निश्‍चित मानला जात आहे. असे असल्याने विरोधकांच्या पायाखालची वाळू सरकली असून त्यामुळेच ते अशापद्धतीने आमच्या उमेदवार रुपाली ठोंबरे-पाटील यांना भ्रमणध्वनीद्वारे धमक्या देत असल्याचेही युवराज पवार यांनी ‘सातारा टुडे’शी बोलताना सांगितले आहे.
राज्यात विधानपरिषदेच्या रिक्त झालेल्या पदवीधर आणि शिक्षक मतदारसंघाच्या पाच जागांसाठी निवडणूक होत आहे. पुण्यात पदवीधर मतदारसंघातून भाजपकडून संग्रामसिंह देशमुख, महाविकास आघाडीकडून अरुण लाड, तर मनसेकडून पुण्यातील माजी नगरसेविका रुपाली ठोंबरे-पाटील यांच्यासह अनेकजण निवडणुकीच्या रिंगणात उतरल्याने प्रचाराची रणधुमाळी सुरु आहे. असे असतानाच रुपाली ठोंबरे-पाटील यांना भ्रमणध्वनीद्वारे जिवे मारण्याची धमकी देण्यात आल्याने संपूर्ण महाराष्ट्रात खळबळ उडाली आहे.