सातारा: शहराच्या मध्यवर्ती ठिकाणी असलेल्या फलटण बस स्थानकात पहाटेच्या सुमारास 50 वर्षीय महिलेचा खून झाला आहे. याप्रकरणी संशयितास ताब्यात घेतले असून अविनाश रोहिदास जाधव (रा. संतोषी माता नगर, मलटण, ता. फलटण) असे त्याचे नाव आहे. याबाबत फलटण शहर पोलिसांकडून मिळालेली माहिती अशी की, सोमवार दि.2 नोव्हेंबर रोजी पहाटेच्या सुमारास फलटण बस स्थानकात एका 50 वर्षीय महिलेचा खून झाल्याची घटना निदर्शनास आल्यानंतर बस स्थानकाजवळील रिक्षा चालक व नागरिकांनी संशयितास पकडले. फलटण शहर पोलीस ठाण्यात याबाबत माहिती दिल्यानंतर पोलिसांनी संशयितास ताब्यात घेतले. घटनास्थळी श्वानपथक पाचारण करण्यात आले होते. या महिलेच्या डोक्याला गंभीर जखम झाली असून ही जखम फरशीवर पडल्यामुळे अथवा लोखंडी वस्तू ने डोक्यावर प्रहार केल्यामुळे झाली असल्याचा प्राथमिक अंदाज व्यक्त करण्यात आला आहे. या खुनाचे कारण अद्याप स्पष्ट झाले नसून या घटनेची फिर्याद राज्य परिवहन महामंडळाचे सुरक्षारक्षक दत्तात्रय बबन सोनवलकर (वय 55, रा.दुधेबावी ता.फलटण) यांनी दिली आहे. त्यानुसार फलटण शहर पोलीस ठाण्यात भादवि कलम 302 नुसार गुन्हा दाखल करण्यात आला असून अधिक तपास पोलीस निरीक्षक प्रताप पोमण करीत आहेत.