सातारा : वंचित घटकांच्या हातात झेंडा आहे मात्र आमच्याकडे घर नाही. झेंडा लावायचा कुठे हा प्रश्न असल्यामुळे भटक्या विमुक्त जमाती संघटना दि. १५ ऑगस्ट रोजी सातारा येथे शांततेच्या मार्गाने झेंडा रॅली काढणार असल्याची माहिती संघटनेचे अध्यक्ष लक्ष्मण माने यांनी पत्रकार परिषदेत दिली.
ते पुढे म्हणाले, सातारा हा क्रांतीकारकांचा जिल्हा आहे. आम्ही वंचित असलो तरी, वंचित घटकांना घरे-दारे नसली तरी ही आमची मातृभूमी आहे. ही आमची भावना असल्यामुळे आम्ही दि. १५ ऑगस्ट रोजी सकाळी ११ वाजता डॉ. बाबासाहेब आंबेडकर यांच्या पुतळ्याला अभिवादन करून शांततेच्या मार्गाने झेंडा रॅली काढणार आहोत. डॉ. बाबासाहेब आंबेडकर यांच्या पुतळ्यापासून जिल्हाधिकारी कार्यालयापर्यंत रॅली काढण्यात येणार आहे. त्या ठिकाणी जिल्हाधिकारी यांना निवेदन देऊन सध्या ज्या ठिकाणी वंचित घटक राहत आहेत, तेथील जागा त्यांच्या नावावर करावी अशी विनंती आम्ही करणार आहोत, असेही त्यांनी यावेळी सांगितले. १५ ऑगस्ट २०२२ रोजी भारतीय राष्ट्रीय स्वातंत्र्याला ७५ वर्ष पूर्ण होत आहेत. ७५ वर्षात कोणाला काय मिळाले आणि कोणाला काय मिळाले नाही याचा ताळेबंद मांडण्याची ही वेळ नाही. व्यथा जरूर मांडली पाहिजे, ही आमची मातृभूमी आहे. मात्र ती ही वेळ नाही असेही त्यांनी यावेळी नमूद केले.यावेळी अशोक जाधव, सचिन वायदंडे, दीपक जाधव उपस्थित होते.