नवी दिल्ली :  रामनाथ कोविंद यांची राष्ट्रपती पदासाठी उमेदवारी जाहीर करताना भारतीय जनता पार्टीने धक्कातंत्राचा वापर केला होता. आताही अन्य नावे चर्चेत असली तरी प्रत्यक्षात वेगळ्याच व्यक्तीच्या गळ्यात ही माळ पडेल असे मानले जाते आहे. त्याहुन देशाचे आगामी राष्ट्रपती हे मुस्लिम समुदायातून आले असण्याची दाट शक्‍यता असल्याचा अंदाजही काही वाहिन्यांनी सूत्रांच्या हवाल्याने वर्तवला आहे. आरिफ मोहम्मद खान यांच्याही नावाची चर्चा आहे. ते सध्या केरळचे राज्यपाल आहेत आणि पुरोगामी मुस्लीम नेते अशी त्यांची ओळख आहे. देशात आणि जगभरात पुरोगामित्वाचा संदेश देण्यासाठी भाजप आरिफ मोहम्मद खान यांची निवड करण्याची शक्‍यता नाकारता येत नाही.

गेल्या राष्ट्रपती निवडणुकीवेळी म्हणजेच 2017 साली रामनाथ कोविंद यांचे नाव जाहीर करून भाजपने सर्वांनाच धक्का दिला होता. त्यापूर्वी कुठेही कोविंद यांचे नाव कोणाच्या ध्यानीमनीही नव्हते. तसेच विद्यमान उपराष्ट्रपती व्यंकय्या नायडू यांना उपराष्ट्रपतीपदाची उमेदवारी देऊन भाजपने असाच धक्का दिला होता.

आताही आपला हिंदुत्वाचा अजेंडा बाजूला ठेऊन जातीय आणि धार्मिक समीकरणे जुळवण्यासाठी आपल्या निर्णयाचा काय उपयोग होऊ शकतो, याचा विचार करून भाजपकडून राष्ट्रपतीपदाचा उमेदवार जाहीर केला जाण्याची शक्‍यता आहे. त्यामुळेच कोणी विचारही केला नसेल असे नाव अचानक समोर येण्याची शक्‍यताही वर्तवली जाते आहे.

विशेष म्हणजे भाजपचा मुस्लिम चेहरा आणि फारसे चर्चेत नसलेले नेते मुख्तार अब्बास नक्वी यांच्या नावाची चर्चा आहे. केंद्रात मंत्री असलेल्या नक्वी यांना ही संधी दिली जाऊ शकते, अशी जोरदार चर्चा आहे. नक्वी हे बऱ्याच काळापासून भाजपशी संबंधित असून वादांपासून ते लांबच राहीले आहेत. वादग्रस्त विधाने न करणे आणि समुदायात सरकारची चांगली प्रतिमा ठासवणे हे काम त्यांनी केले आहे. त्यांचे व्यक्तीमत्व आणि मुस्लिम समाजाच्या दृष्टीने आश्‍वासक चेहरा म्हणून त्यांची निवड होऊ शकते.