झारखंड : सक्तवसुली संचालनालयानं साहिबगंज जिल्ह्यातील अवैध खाणकाम प्रकरणात  झारखंडचे मुख्यमंत्री हेमंत सोरेन यांना समन्स बजावला आहे. मुख्यमंत्र्यांना चौकशीसाठी गुरुवारी तपास अधिकाऱ्यांसमोर हजर राहण्यास सांगण्यात आले आहे. "मुख्यमंत्र्यांचे सहकारी पंकज मिश्रा यांच्याविरोधातील तपासादरम्यान काही बाबी समोर आल्या. या गोष्टींची पडताळणी करणे आवश्यक आहे", असे ईडीच्या अधिकाऱ्याने सांगितलं आहे.

बरहैट विधानसभा मतदारसंघाचे आमदार पंकज मिश्रा यांना ईडीने चौकशीसाठी ताब्यात घेतलं आहे. अवैध खाणकाम प्रकरणात देशभर तपास यंत्रणेकडून शोध सुरु आहे. मिश्रा यांच्या नियंत्रणाखाली असलेल्या साहिबगंज आणि आसपासच्या परिसरात तब्बल १ हजार कोटींचे अवैध उत्खनन झाल्याची माहिती ईडीने विशेष न्यायालयात दिली आहे.

"मुख्यमंत्र्यांनी मिश्रा यांना संथल परगनामधील दगड आणि वाळू उत्खननातून येणारा निधी प्रेम प्रकाश यांना द्यायला सांगितला होता. या बदल्यात प्रकाश व्यापाऱ्यांकडे पैसे सुपुर्द करायचे", असं ईडी चौकशीत झारखंड मुक्ती मोर्चाचे माजी खजिनदार रवी केजरीवाल यांनी सांगितलं आहे. ईडीनं मनी लॉन्ड्रिंग प्रकरणात मिश्रा यांच्याविरोधात गुन्हा दाखल केला होता. अवैध उत्खननातून त्यांनी मोठी संपत्ती जमवल्याचा त्यांच्यावर आरोप आहे.