सातारा : विरुद्ध दिशेने भरधाव जाणारी दुचाकी कारला धडकल्याने दुचाकीस्वार जागीच ठार झाला. सैदापूरनजीक सोमवारीहा भीषण अपघात झाला. सूरज संपत महामुलकर (वय ३३, रा. करंदोशी, ता. जावळी, जि. सातारा) असे मृताचे नाव आहे.

पोलीससूत्रानुसार, सूरज महामुलकर हा लिंबखिंडीतून दुचाकीने साताऱ्याकडे येत होता. त्यावेळी सैदापूरजवळ आल्यानंतर तो विरुद्ध दिशेने भरधाव दुचाकी चालवू लागला. याचवेळी समोरून कार येत होती. या कारला त्याच्या दुचाकीची जबर धडक बसली. यात सूरजच्या डोक्याला आणि हाता-पायाला गंभीर मार लागला. यात त्याचा जागीच मृत्यू झाला. कारमधील चालक शोयेब सय्यद, जहीर शेख (रा. शनिवार पेठ, सातारा) हे दोघे जखमी झाले. 
या अपघाताची सातारा तालुका पोलीस ठाण्यात नोंद केली असून, पोलीस उपनिरीक्षक मनोहर फरांदे हे अधिक तपास करीत आहेत.