सातारा : एकीकडे महाराष्ट्रात उद्या ठाकरे सरकारला बहुमतास सामोरे जावे लागणार असतानाच राज्यभरात शिवसेनेच्या बंडखोर आमदारांविरुध्द असलेला रोष सुरुच आहे. सातारा जिल्ह्यातही शिवसेनेत समर्थक व विरोधक असे दोन गट पडले असून बुधवारी कोरेगाव तालुक्यातील वाठार स्टेशन येथे बंडखोर एकनाथ शिंदे व आमदार महेश शिंदे यांच्या समर्थनार्थ लावण्यात आलेले बॅनर फाडल्याने मोठा तणाव निर्माण झाला होता. दरम्यान आमदार महेश शिंदे यांचे समर्थक पोलीस ठाण्यात दाखल झाले असून गुन्हा दाखल करण्याचे काम सुरू असल्याचे समोर येत आहे.

जिल्ह्यात बंडखोर आमदार एकनाथ शिंदे, शंभूराज देसाई व महेश शिंदे यांना विरोध होत असताना त्यांचे समर्थकही त्यांना समर्थन देण्यासाठी रस्त्यावर येवू लागले आहेत. तर दुसरीकडे मोठया प्रमाणावर फलकबाजीही सुरु करण्यात आली आहे. काल महेश शिंदे यांना कोरेगावात समर्थन देण्यासाठी मोर्चा काढण्यात आला तर खटाव तालुक्यात बंडखोर आमदारांना उलटे टांगून मिर्च्याची धुरीही देण्यात आल्याची घटना समोर आली.

बुधवारी वाठार स्टेशन परिसरात आमदार महेश शिंदे यांच्या समर्थकांनी एकनाथ शिंदे व महेश शिंदे यांचे फोटो वापरुन त्यांचे समर्थन करणारा बॅनर उभा केला होता. तोच अज्ञाताने फाडून टाकला. बॅनर फाडल्याचे समोर येताच आमदार महेश शिंदे समर्थक परिसरात जमा झाले. बॅनर फाडण्याच्या घटनेनंतर वाठार स्टेशन परिसरात समर्थक जमा झाल्याने तणावाचे वातावरण निर्माण झाले होते. महेश शिंदे समर्थकांनी घोषणाबाजी करत पोलीस ठाणे गाठले असून तिथे फलक फाडणाराविरुध्द तक्रार देण्याचे काम सुरु आहे. दरम्यान, वाठार स्टेशन पोलिसांनी परिसरात कोणताही अनुचित प्रकार घडू नये यासाठी पोलीस बंदोबस्त तैनात केला होता.