अमृतसर : शिवसेना नेते सुधीर सुरी यांच्यावर पंजाबमध्ये भरदिवसा हल्ला करण्यात आला आहे. अमृतसरमध्ये त्यांच्यावर गोळीबार करण्यात आला. गोपाळ मंदिराच्या बाहेर कचऱ्यात देवांच्या मूर्ती आढळल्यानं ते मंदिराबाहेर धरणे आंदोलन करत होते. यावेळी गर्दीतून अज्ञातानं येत गोळीबार केला.

चार वर्षांपूर्वी सुधीर सुरी यांच्यावर हल्ला झाला होता. गेल्या काही दिवसांपासून सुधीर सुरी यांच्यावर हल्ल्याचे प्रयत्न झाले होते. पोलिसांनी गेल्या महिन्यात काही जणांना अटक केली होती त्यात ही बाब स्पष्ट झाली होती.  पंजाब एसटीएफ आणि अमृतसर पोलिसांच्या संयुक्त ऑपरेशनमध्ये गेल्या महिन्यात ४ जणांना अटक करण्यात आली होती. ते चार जण गँगस्टर रिंदा आणि लिंदा या गँगशी संबंधित होते. त्यांच्या चौकशीतून ही बाब समोर आली आहे.

सुधीर सुरी हे शिवसेना नेते असल्याचं सांगितलं जात असून अमृतसरमधील आंदोलनात त्यांच्यावर गोळीबार करण्यात आला आहे. त्यांना सध्या रुग्णालयात उपचारासाठी दाखल करण्यात आलं आहे. अमृतसरमधील मजिठा रस्त्यावर ते धरणे आंदोलन करत होते.

अमृतसरमधील मजिठा रस्त्यावरील मंदिराबाहेर सुधीर सुरी आंदोलन करत होते. कचरा हटवला नाही तर मंदिर ट्रस्टच्या अध्यक्षांविरोधात तक्रार करु, असं ते म्हणाले होते. सुधीर सुरी यांची पोलिसांसोबतआंदोलनासंदर्भात चर्चा सुरु होती. या दरम्यान संदीप नावाच्या एका तरुणानं सुधीर सुरी यांच्यावर हल्ला केला आहे. पोलिसांनी संदीपला ताब्यात घेतलं असून शीख विरोधी वक्तव्य केल्यानं हल्ला केल्याचं संबंधित तरुणानं सांगितलं आहे.  संदीप नावाचा हा तरुण अमृतरसरमधील असून नेमक्या कोणत्या गटाशी संबंधित आहे, याबाबतची सविस्तर माहिती समोर आली नाही.

सुधीर सुरी यांच्यावर गोळीबार झाल्याची माहिती मिळताच पोलीस दलातील वरिष्ठ अधिकारी घटनास्थळी दाखल झाले. आम्ही सर्व गोष्टींची पडताळणी करत असल्याचं पंजाब पोलिसांच्या वरिष्ठ अधिकाऱ्यांनी सांगितलं आहे. सर्व बाबींची तपासणी झाल्यानंतर सुधीर सुरी यांच्यावरील हल्ल्यासंदर्भातील माहिती देऊ, असं पोलीस म्हणाले. सुधीर सुरी यांना अमृतसरमधील रुग्णालयात दाखल करण्यात आलं असून त्यांची प्रकृती गंभीर असल्याचं कळतंय.