जकार्ता: गेल्या काही दिवसांपासून इंडोनेशियावर संकट कोसळत आहेत. संकटांचा सामना करणार्‍या इंडोनेशियाला अजून एक धक्का बसला आहे. काही दिवसांपूर्वी समुद्रात कोसळले तर आता 6.2 रिश्टर स्केेलच्या भूकंपाने देश हादरला आहे. यामध्ये 34 जणांचा मृत्यू झाला असून 600 हून अधिक जण जखमी झाले आहे. मृतांचा आकडा वाढण्याची भितीही व्यक्त केली जात आहे. 
सुलावेसी बेटावर मध्यरात्री 6.2 रिश्टर स्केलचा भूकंप झाला. मदत आणि बचाव कार्य सुरू आहे. इंडोनेशियाच्या अधिकार्‍यांनी सांगितले की, 600 जण जखमी झाले आहेत. भूकंपामुळे नुकसान झालेल्या भागाचा आढावा घेतला जात आहे. जखमींची आणि मृतांची संख्या वाढण्याची भीती असल्याचे अधिकार्‍यांनी सांगितले. मदत आणि बचाव कार्य जोमाने सुरू असून कोसळलेल्या घराच्या ढिगार्‍यातून नागरिकांना वाचवण्याचे प्रयत्न सुरू आहेत. या भूकंपात एका रुग्णालयाचा काही भाग कोसळला आहे. त्यामुळे तंबू उभारून नागरिकांवर उपचार सुरू आहेत. जवळपास दोन हजार नागरिकांना सुरक्षित स्थळी नेण्यात आले आहे.
या भूकंपाचे केंद्र पश्चिम सुलावेसी प्रातांतील मामुजु जिल्ह्यात जमिनीखाली 18 किमी खोल अंतरावर होते. या भागात समुद्रात 5.9 रिश्टर स्केल क्षमतेचा भूकंप आला होता. शुक्रवारी आलेल्या भूकंपात जवळपास 300 घरांचे नुकसान झाले आहे. काही ठिकाणी भूकंपाचे आफ्टरशॉक्सही जाणवण्याची भीती आहे. अनेक ठिकाणी वीज पुरवठाही खंडीत झाला असल्याची माहिती समोर आली आहे.