दिल्ली : फटाक्यांच्या बंदीला आव्हान देणाऱ्या भाजप नेते मनोज तिवारी यांच्या याचिकेवर लवकर सुनावणी घेण्यास सर्वोच्च न्यायालयाने नकार दिला आहे. लोकांनी स्वच्छ हवेत श्वास घ्यावा, मिठाईवर पैसे खर्च करावेत, असे सर्वोच्च न्यायालयाने म्हटले आहे. मनोज तिवारी यांचे वकील शशांक शेखर झा यांनी दिवाळी जवळ आल्याचे कारण देत तातडीने सुनावणीची मागणी केली होती. तिवारी यांनी 23 सप्टेंबर रोजी सर्वोच्च न्यायालयात धाव घेतली होती.

विशेष म्हणजे जगण्याच्या अधिकाराच्या निमित्ताने धर्मस्वातंत्र्य हिरावून घेतले जाऊ शकत नाही, असे याचिकेत म्हटले होते. मनोज तिवारी यांनी फटाके विक्री, खरेदी आणि फोडण्याबाबत नवीन मार्गदर्शक तत्त्वे जारी करण्याचे निर्देश सरकारकडे मागितले होते. सर्वोच्च न्यायालयानेच पर्यावरणपुरक फटाके वापरण्यास परवानगी दिली असताना त्यांनी सर्वसाधारण बंदीवर प्रश्नचिन्ह उपस्थित केले होते.

आगामी सणासुदीच्या काळात फटाके विकणार्‍या किंवा वापरणार्‍या सामान्य लोकांवर एफआयआर नोंदवण्यासारखी कोणतीही दंडात्मक कारवाई करू नये, अशी मागणी भाजप खासदाराने केली होती. विशेष म्हणजे 2020 पासून दिल्लीत दिवाळीत फटाके फोडण्यावर बंदी आहे. याशिवाय हरियाणाने गेल्या वर्षी आपल्या 14 जिल्ह्यांमध्ये सर्व प्रकारच्या फटाक्यांच्या विक्रीवर आणि वापरावर बंदी घातली होती. मात्र, निर्बंध असतानाही दिल्ली, नोएडा, फरिदाबाद आणि गुरुग्राममध्ये रात्री उशिरापर्यंत लोकांनी फटाके फोडले.

दिल्लीत दिवाळीत फटाके फोडणाऱ्यांना 6 महिन्यांपर्यंत तुरुंगवास

दिल्लीत दिवाळीत फटाके फोडणाऱ्यांना 6 महिन्यांपर्यंत तुरुंगवास आणि 200 रुपयांचा दंड होऊ शकतो. बुधवारी ही माहिती देताना दिल्लीचे पर्यावरण मंत्री गोपाल राय म्हणाले की, दिल्लीत फटाक्यांचे उत्पादन, साठवणूक आणि विक्री केल्यास 5000 रुपयांपर्यंतचा दंड आणि स्फोटक कायद्याच्या कलम 9B अंतर्गत 3 वर्षांच्या तुरुंगवासाची शिक्षा होऊ शकते. यासोबतच त्यांनी लोकांना या दिवाळीत फटाके न फोडण्याचे आवाहन केले आहे. लोकांना जागरूक करण्यासाठी दिल्ली सरकार जनजागृती करणार आहे. कॅनॉट प्लेसमधील सेंट्रल पार्कपासून याची सुरुवात होईल. येथे 51 हजार दिवे लावले जाणार आहेत.