कोरेगाव : तडवळे सं.वाघोली ता.कोरेगाव येथील तुळजाभवानी स्टोन क्रशर पर्यावरणाचे कोणतेही नियम पाळत नाही. कायदा पायदळी तुडवून हे क्रशर सुरू असून हे क्रशर ताबडतोब बंद करण्यात यावे अन्यथा दि.26 जानेवारी प्रजासत्ताक दिनी जिल्हाधिकारी कार्यालयासमोर आपण आत्मदहन करणार असल्याचा इशारा जिल्हा राष्ट्रवादी काँग्रेस सामाजिक न्याय विभागाचे अध्यक्ष रमेश उबाळे यांनी दिला आहे. याबाबतचे निवेदनही त्यांनी जिल्ह्याधिकाऱ्याना दिले आहे. 
रमेश उबाळे यांनी दिलेल्या निवेदनात म्हटले आहे, तडवळे सं.वाघोली येथील तुळजाभवानी स्टोन क्रशर हे देऊर येथील राहुल बबन कदम यांचे आहे. हे क्रशर महाराष्ट्र पोलुशन कंट्रोल बोर्ड यांनी दिलेल्या नियमांचे उल्लंघन करून सुरू आहे. याप्रकरणी आपण दि. 27.11.2022 रोजी निवेदन दिले होते. या निवेदनामध्ये हे क्रशर पर्यावरणाचे सर्व नियम डावलून सुरू असलेच्या निदर्शनास आणून देऊनही अद्याप हे क्रशर सुरू आहे. दि.25 पर्यंत हे क्रशर बंद न झाल्यास दि. 26 जानेवारी म्हणजेच प्रजासत्ताकदिनी आपण जिल्हाधिकारी कार्यालयासमोर आत्मदहन करणार आहे. यामध्ये माझ्या जीवाचे काही बरे वाईट झाल्यास सर्व अधिकारी जबाबदार राहतील, असेही त्यांनी निवेदनात नमूद केले आहे.  
निवेदनाच्या प्रती मुख्यमंत्री, उपमुख्यमंत्री, पर्यावरण मंत्री, महाराष्ट्र प्रदूषण नियामक मंडळ, मुबंई, महाराष्ट्र प्रदूषण नियामक मंडळ, पुणे, महाराष्ट्र प्रदूषण नियामक मंडळ, सातारा, पोलीस अधीक्षक, कोरेगाव तहसीलदार, प्रांत कार्यालय, कोरेगाव यांनाही देण्यात आल्या आहेत.

क्रशर मालकावर गुन्हा दाखल करा 
तुळजाभवानी स्टोन क्रशर सर्व नियम पायदळी तुडवून सुरू असल्याने परिसरातील नागरिकांचे आरोग्य धोक्यात आले असून अनेकांना श्वसनाचे आजार होऊ लागले आहेत. याला जबाबदार कोण?  असा सवाल उपस्थित करून याची चौकशी करून स्टोन क्रशरच्या मालकावर गुन्हा दाखल करण्यात यावा, अशी मागणीही रमेश उबाळे यांनी केली आहे.