सातारा: महाबळेश्वर येथील बाजारपेठ परिसरात असलेल्या एटीएमवर डल्ला मारण्याचा चोरट्यांनी प्रयत्न केला. बाजारपेठेतील हे एटीएम मशीन फोडण्याचा चोरट्यांचा बेत फसला असला तरी या प्रकारामुळे नागरिकांच्यात मात्र भीतीचे वातावरण पसरले आहे. नुकत्याच बाजारपेठा सुरू झाल्या असल्या तरी चोरटेही अनलॉक होवू लागले आहे. त्यामुळे आधीच आर्थिक संकटात सापडलेल्या व्यापारी वर्गाला व नागरिकांना या प्रकरणामुळे चांगलाच धक्का बसला आहे.
महाबळेश्वरची मुख्य बाजारपेठ असलेल्या प्रवेशद्वाराजवळ सुभाषचंद्र बोस चौकात असलेल्या एटीएम मशीन फोडण्याचा चोरट्यांनी प्रयत्न केला. मंगळवारी मध्यरात्री लोखंडी ग्रील कापून चोरट्यांनी आत प्रवेश केला. चोरी करताना चोरट्यांनी मोठ्या शिताफीने या परिसरातील सीसीटीव्ही कॅमेरे फिरवले. परंतु नागरिकांच्या सुदैवाने त्यांना हे एटीएम मशीन फोडता आले नाही.
मात्र मुख्य बाजारपेठेतील एटीएम फोडण्याचे चोरट्यांनी केलेले धाडस मात्र चिंतेचा विषय बनला आहे. सध्या शासनातर्फे पर्यटनस्थळे पर्यटकांसाठी खुली करण्यात आली आहेत. त्यामुळे सध्या महाबळेश्वर पर्यटकांनी गजबजले आहे. पर्यटनस्थळाचे अर्थचक्र फिरू लागले असतानाच चोरट्यांच्या या प्रतापाने नागरिकांच्या मनात मात्र भीती निर्माण झाली आहे.