सांगली: सोन्याचा भाव आलेल्या वाळूसाठी मुजोर वाळू तस्करांनी उच्छाद मांडला आहे. सांगलीतील तासगाव येथील कूपर ओढ्याच्या परिसरात एक संतापजनक घटना घडली आहे. वाळू उपसा रोखण्यासाठी आणि वाळूमाफियांविरोधात कारवाईसाठी गेलेल्या महिला तहसीलदाराला ठार मारण्याचा प्रयत्न करण्यात आला. शनिवार दि.22 रोजी दुपारी घडलेल्या प्रकारानंतर संतापाची लाट उसळली आहे. 
याबाबत तासगाव पोलीस ठाण्यात तक्रार दाखल करण्यात आली आहेे. अनिकेत अनिल पाटील (रा. पुणदी रोड, तासगाव) याच्यासह आणखी एका अनोळखी हल्लेखोरावर गुन्हा दाखल करण्यात आला आहे. तासगाव पोलिसांनी दिलेल्या माहितीनुसार, तासगाव शहरापासून जवळच असलेल्या कपूर ओढ्यात अवैध वाळू उपसा आणि वाहतूक सुरू असल्याची माहिती तहसीलदार कल्पना ढवळे यांना मिळाली होती. माहितीची खात्री करून त्या शनिवारी दुपारी एकच्या सुमारास कर्मचार्‍यांसह कपूर ओढ्यावर पोहोचल्या. यावेळी एका पिकअप वाहनात अवैधरित्या वाळू भरण्याचे काम सुरू होते. तहसीलदार ढवळे यांनी उपस्थितांना काम थांबवण्याची सूचना केली. वाहन जप्तीची कारवाई करणार असल्याचे त्यांनी सांगितले. यावेळी अनिकेत पाटील आणि त्याच्या सहकार्‍याने तहसीलदारांच्या कारवाईला विरोध केला.
सरकारी कामामध्ये अडथळा आणून त्यांनी वाळूने भरलेले पिकअप वाहन बेदरकारपणे चालवत तहसीलदारांच्या दिशेने आणले. अंगावर वाहन घालून त्यांना ठार मारण्याचा प्रयत्न केला. मात्र, वेळीच बाजूला झाल्याने तहसीलदार बचावल्या. स्वतःचा बचाव करताना जमिनीवर पडल्याने त्या किरकोळ जखमी झाल्या. याबाबत तहसीलदार ढवळे यांनी मंगळवारी रात्री उशिरा तासगाव पोलीस ठाण्यात तक्रार दाखल केली. पोलिसांनी अनिकेत पाटील याच्यासह त्याच्या सहकार्‍यावर गुन्हा दाखल केला.