मुंबई : "शिवसेनेचे कोल्हापूरचे जिल्हाप्रमुख संजय पवार आणि मी राज्यसभेसाठी उमेदवारी अर्ज भरलेला आहे. भाजपने तिसरी जागा लढवली तरी फरक पडत नाही, त्यांनी कितीही प्रयत्न करू द्या, विजय आमचाच होणार", असा विश्वास व्यक्त करत शिवसेना खासदार संजय राऊत यांनी भाजपला ललकारलं. शिवसेनेच्या उमेदवारांना संपूर्ण महाविकास आघाडीचा पाठिंबा आहे, त्यामुळे विजय निश्चित असल्याचं राऊत म्हणाले.

खासदार संजय राऊत आणि कोल्हापूरचे निष्ठावंत शिवसैनिक संजय पवार यांनी राज्यसभेसाठी अर्ज दाखल केला. दुपारी २ वाजताच्या दरम्यान त्यांनी विधानभवनात अर्ज दाखल केला. यावेळी मुख्यमंत्री उद्धव ठाकरे, ज्येष्ठ नेते शरद पवार, काँग्रेसचे नेते मंत्री बाळासाहेब थोरात तसेच सेनेचे सगळे मंत्री, मविआचे प्रमुख नेते उपस्थित होते. अर्ज दाखल केल्यानंतर संजय राऊत यांनी माध्यमांशी संवाद साधला. यावेळी सेनेच्या दोन्ही उमेदवारांचा विजय निश्चित असल्याचं त्यांनी सांगितलं.

संजय राऊत म्हणाले, "मी आणि संजय पवार यांनी उमेदवारी अर्ज दाखल केला. अर्ज दाखल करतेवेळी मुख्यमंत्री, पवारसाहेब, बाळासाहेब थोरात, विविध मंत्री, आमदार, खासदार यावेळी उपस्थित होते. मी खात्रीने सांगतो यावेळी सेनेचे दोन्ही उमेदवार राज्यसभेत जातील. कारण शिवसेनेच्या उमेदवारांना संपूर्ण महाविकास आघाडीचा पाठिंबा आहे. राज्यसभेच्या सहा जागांपैकी आमच्या मविआचे ४ उमेदवार नक्कीच विजयी होतील. याबद्दल माझ्या मनात शंका नाही"

"राष्ट्रवादीचे प्रफुल्ल भाई पटेल हे उमेदवार असतील तसेच माझ्या माहितीप्रमाणे ते ३१ तारखेला अर्ज भरतील. तसेच परंपरेप्रमाणे काँग्रेस आपला उमेदवार निश्चित करुन त्याचं नाव जाहीर करेल आणि त्यानंतर अर्ज भरेल", असं संजय राऊत यांनी सांगितलं.

मंत्री अनिल परब यांच्यावरील ईडीच्या कारवाईबद्दल राऊतांना पत्रकारांनी प्रश्न विचारला. त्यावर या कारवाया सूडबुद्धीने होत असल्याचा आरोप त्यांनी केला. अशा कारवाया करुन निवडणुका जिंकू असं त्यांना वाटत असेल तर त्यांनी नक्की कारवाया कराव्यात. सध्याचा काळही एक दिवस निघून जाईल नंतर सूत्रे आमच्या हातात येतील, असा सूचक इशाराही त्यांनी भाजपला दिला.