सातारा : कराड च्या कृष्णा पॅलेस परिसरात बेकायदेशीररित्या पिस्तुल बाळगणाऱ्या शंकर बदु जाधव रा. वाघेश्वर, मसूर, ता. कराड या इसमाला कराड पोलिसांनी ताब्यात घेतले. या कारवाईत पन्नास हजार रुपये किंमतीचे पिस्तुल व तीनशे रुपयांची काडतुसे असा मुद्देमाल जप्त केला आहे.

कराड विभागाचे उपअधीक्षक अमोल ठाकूर यांना हॉटेल कृष्णा पॅलेस परिसरात एक इसम पिस्तुलासह येणार असल्याची माहिती मिळाली होती. ठाकूर यांनी ताबडतोब पोलिसांची दोन पथके पंचांसह या परिसरात तैनात केली. संशयिताचे परिसरात आगमन होताच पोलिसांनी त्याला पकडून त्याची अंगझडती घेतली. त्यावेळी जाधव याच्या कमरेस पन्नास हजार रुपये किंमतीचे पिस्तुल आढळून आले. तसेच तीनशे रुपये किंमतीचे जिवंत राउंड जप्त करण्यात आले.

या कारवाईत पोलीस उपनिरीक्षक आर. पी. पुजारी, अरुण दुबळे, सागर बर्गे, असिफ जमादार, प्रवीण पवार, सचिन साळुंखे, सुधीर जाधव यांनी सहभाग घेतला होता. संबंधित पथकाचे पोलीस अधीक्षक समीर शेख यांनी अभिनंदन केले आहे.