सातारा: पुणे बेंगलोर हायवेवरील उंब्रज मध्ये रहदारीच्या ठिकाणी असलेले एक बॅटरीचे दुकान चोरट्यांनी पहाटेच्या सुमारास फोडले. या रस्त्यावर कायम रहदारी असतानाही चोरट्यांनी हे दुकान फोडून सुमारे 50 हजार रूपयांच्या 28 बॅटरी लंपास केल्या. त्यामुळे या चोरीबाबत परिसरातून आश्चर्य व्यक्त केले जात आहे. 
याबाबत सविस्तर माहिती अशी की, पुणे - बेंगलोर महामार्गावर उंब्रज येथील एका पेट्रोलपंपानजिक सुपेरिअर नावाचे बॅटरीचे दुकान आहे. या दुकानात नवीन बॅटरी विक्री तसेच जुन्या बॅटरीच्या दुरूस्तीचे काम चालते. या दुकानाचे मालक जॉय आण्णा मुळ राहणार केरळ सध्या उंब्रज येथे वास्तव्यास आहेत. सोमवारी सायंकाळी नेहमीप्रमाणे ते दुकान बंद करून घरी गेले. दुसर्‍या दिवशी दुकानात आल्यानंतर दुकानात चोरी झाल्याचे त्यांच्या निदर्शनास आले. त्यानंतर याबाबत तात्काळ उंब्रज पोलिस ठाण्यात चोरीची तक्रार दाखल केली. 
मंगळवारी पहाटेच्या सुमारास चोरट्यांनी बंद दुकानाचे कुलूप कटावणीने तोउून प्रवेश केला. दुकानातील सुमारे चार हजार रूपये किंमतीच्या विविध कंपन्यांच्या बॅटरी तसेच दुरूस्तीसाठी आलेल्या काही बॅटरी अशा एकूण सुमारे 50 हजार रूपये किमतीच्या 28 बॅटरी लंपास केल्या. रहदारीच्या ठिकाणी चोरट्यांनी दुकान फोडल्याने याबाबत आश्चर्य व्यक्त केले जात आहे.