नवी दिल्ली: “देशातील वातावरण आणि मूड बदलण्यासाठी क्रीडा स्पर्धा होणं अत्यंत महत्त्वाचे आहे. आयपीएल सुरू झाल्यास, त्याचा मोठा परिणाम दिसून येईल,” असं धवन म्हणाला. श्रीलंकेचा अष्टपैलू खेळाडू अँजेलो मॅथ्यू याच्याशी चर्चा करताना तो बोलत होता. त्यानं पुढे सांगितले की,”प्रत्येकाच्या सुरक्षेची योग्य ती काळजी घेणं गरजेचं आहे. आयपीएल झाल्यास ते आमच्यासाठी आनंदाची गोष्ट असेल. शिवाय त्यामाध्यमातून जगभरातील लोकांमध्ये सकारात्मकताही पसरण्यास मदत होईल.”
कोरोना व्हायरसच्या संकटात जगभरातील अनेक क्रीडा स्पर्धा रद्द करण्यात आल्या आहेत.   इंडियन प्रीमिअर लीगवर (आयपीएल) अजूनही अनिश्चिततेचं सावट आहे. देशातील सद्यस्थिती पाहता, आता तरी ती खेळवली जाईल, याची शक्यता फार कमी आहे. पण, आयपीएल खेळवायला हवी, असं मत भारताचा सलामीवीर शिखर धवननं व्यक्त केलं आहे आणि त्यामागे त्यानं एक लॉजिकही सांगितलं आहे.
जगभरातील कोरोना रुग्णांचा आकडा 55 लाखांच्या वर गेला आहे. त्यापैकी 23 लाख रुग्ण बरे झाले आहेत, परंतु जवळपास साडेतीन लाख रुग्णांना प्राण गमवावे लागले आहेत. देशातील कोरोना रुग्णांची संख्या 1 लाख 38, 917 इतकी झाली आहे. त्यापैकी 57,721 रुग्ण बरे झाले आहेत, तर 4 हजार रुग्णांचा मृत्यू झाला आहे. 
कोरोना व्हायरसच्या संकटात आयपीएलच्या माध्यमातून समाजात सकारात्मकता पसरवण्यात मदत होईल आणि लोकांचं मनही प्रसन्न राहिल, असं मत धवननं व्यक्त केलं. त्यामुळे यंदा आयपीएल होईल अशी आशा त्याला आहे.  29 मार्च ते 24 मे या कालावधीत आयपीएल होणं अपेक्षित होतं, परंतु कोरोनामुळे भारतीय क्रिकेट नियामक मंडळाला ( बीसीसीआय) पुढील सुचनेपर्यंत लीग स्थगित करावी लागली आहे.
ट्वेंटी-20 वर्ल्ड कपच्या जागी ऑक्टोबर-नोव्हेंबरमध्ये आयपीएल खेळवण्यात येईल अशी चर्चा आहे. ”आयपीएल होईल, अशी आशा व्यक्त करतो. मी नेहमी सकारात्मक दृष्टीकोनातून विचार करतो. त्यामुळे आयपीएल झाल्यास ते सर्वांसाठी चांगलं असेल. आयपीएल प्रेक्षकांविना झाल्यास, आम्ही ते दिवस मिस करू. चाहत्यांसमोर खेळण्याची मजा काही निराळीच असते.”