मुंबई : राज्यसभेच्या सहाव्या जागेवरुन अपक्ष लढण्याच्या इराद्याने मैदानात उतरलेले संभाजीराजे छत्रपती आता निवडणुकीच्या रिंगणातून माघार घेण्याची दाट शक्यता आहे.  भाजप आणि महाविकास आघाडी यांच्यापैकी कोणीही पाठिंबा न दिल्याने संभाजीराजे यांच्यावर न लढताच माघार घेण्याची नामुष्की ओढावली आहे. एवढेच नव्हे तर राज्यसभा निवडणुकीचा अर्ज दाखल करून घेण्यासाठी लागणारे १० आमदारांचे अनुमोदनही संभाजीराजे छत्रपती यांना जमवता आलेले नाही.

अर्ज भरताना ही परिस्थिती असेल तर प्रत्यक्ष निवडणुकीतही संभाजीराजे यांना कितपत पाठिंबा मिळेल, याबाबत साशंकताच आहे. त्यामुळेच संभाजीराजे छत्रपती यांनी राज्यसभा निवडणुकीतून माघार घेण्याचे निश्चित केल्याची चर्चा आहे. संभाजीराजे छत्रपती शुक्रवारी मुंबईत पत्रकार परिषद घेणार आहेत. तेव्हाच संभाजीराजे याबाबत घोषणा करण्याची शक्यता आहे.

मी फक्त जनतेशी बांधील : संभाजीराजे
तत्पूर्वी संभाजीराजे यांनी फेसबुकवर एक पोस्ट टाकली होती. यामध्ये संभाजीराजे यांनी शिवसेनेच्या भूमिकेवषयी अप्रत्यक्षपणे का होईना, पण नाराजी व्यक्त केली आहे. तसेच मला छत्रपती शिवाजी महाराजांच्या नजरेतलं स्वराज्य घडवायचे आहे.मी त्यांच्या विचारांशी कटिबद्ध असेन. मी फक्त जनतेशी बांधील आहे, असे संभाजीराजे यांनी या पोस्टमध्ये म्हटले आहे.

येत्या १० जून रोजी राज्यसभेच्या सहा जागांसाठी निवडणकू होत आहे. सध्याच्या संख्याबळानुसार, दोन जागांवर भाजप तर शिवसेना, राष्ट्रवादी काँग्रेसचे उमेदवार प्रत्येकी एका जागेवर सहजपणे निवडून येऊ शकतात. त्यानंतरही सहावी जागा रिक्त होती. ही जागा एकहाती जिंकण्यासाठी भाजप किंवा महाविकासआघाडी यांच्यापैकी कोणाकडेही पुरेसे संख्याबळ नाही. त्यामुळे या सहाव्या जागेवर संभाजीराजे छत्रपती यांनी दावा सांगितला होता. या जागेवर निवडून येण्यासाठी सर्वपक्षीय आमदारांनी मला सहकार्य करावे, असे आवाहन संभाजीराजे यांनी केले होते.

आघाडीचा पाठिंबा मिळण्याची शक्यता मावळली
त्यासाठी संभाजीराजे छत्रपती यांनी मुख्यमंत्री उद्धव ठाकरे यांची भेटही घेतली होती.मात्र, राज्यसभेची सहावी जागा शिवसेनेच्या कोट्यातील असल्यामुळे उद्धव ठाकरे यांनी संभाजीराजे यांच्यापुढे पक्षप्रवेशाची अट ठेवली होती. मात्र, संभाजीराजे छत्रपती अपक्ष लढण्यावर ठाम होते. त्यामुळे शिवसेनेने सहाव्या जागेसाठी कोल्हापूरमधील नेते संजय पवार यांना उमेदवारी देण्याचा निर्णय घेतला होता. त्यामुळे संभाजीराजे छत्रपती यांना राज्यसभा निवडणुकीत महाविकास आघाडीचा पाठिंबा मिळण्याची शक्यता मावळली आहे.