फलटण : सांगवी ता. फलटण येथे कल्याण जुगार अड्डय़ावर स्थानिक गुन्हे शाखा पोलीसांनी टाकलेल्या छाप्यात 1 हजार 245 रुपये रोकड व जुगाराचे साहित्य असा मुद्देमाल जप्त करण्यात आला आहे. याप्रकरणी पोलिसांनी बापूराव पांडुरंग वाघ ( वय 35, रा. सांगवी ता फलटण) याच्यावर गुन्हा दाखल केला.  

याबाबत फलटण ग्रामीण पोलिसांनी दिलेली माहिती अशी, दि. 23 मे रोजी स्थानिक गुन्हे शाखा सातारा पोलीस निरीक्षक किशोर धुमाळ यांनी गुप्त बातमीदारामार्फत फलटण तालुक्यातील मटका अड्डय़ाची माहिती मिळाली. धुमाळ यांनी स्थानिक गुन्हे शाखेचे सहायक फौजदार यु. सी. दबडे व पोलीस नाईक काशिद व पोलीस कॉन्स्टेबल जगदाळे यांना तिथे छापा टाकण्याच्या सूचना केली. 

काशीद व जगदाळे हे पेट्रोलिंग करत असताना फलटण-बारामती जाणारे रस्त्याकडेला दत्त मंदिरापाठीमागे सांगवी तालुका फलटण येथे बापूराव पांडुरंग वाघ ( वय 35, रा. सांगवी ता फलटण) हा स्वतःच्या आर्थिक फायद्या करिता लोकांकडून पैसे स्वीकारून आकडा व स्वतःच्या फायद्याकरता लोकांकडून पैसे घेऊन कल्याण मटका जुगार घेताना आढळून आला. पोलीसांनी टाकलेल्ये छाप्यात त्याच्याकडून 1 हजार 245 रुपये रोख रक्कमेचा मुद्देमाल व जुगार साहित्य मिळून आले असून याच्याविरुद्ध महाराष्ट्र जुगार कायद्यानुसार गुन्हा दाखल करण्यात आला असून पुढील तपास पोलीस करत आहेत.