कानपूर : कानपूर कसोटीमध्ये हिंदुस्थानचा मधल्या फळीतील खेळाडू श्रेयस अय्यर याने ऐतिहासिक कामगिरी केली आहे. पदार्पणाची कसोटी खेळणाऱ्या अय्यर याने पहिल्या डावात 105 धावांची खेळी केली, तर दुसऱ्या डावात तो 65 धावा काढून बाद झाला. हिंदुस्थानच्या क्रिकेट इतिहासामध्ये पदार्पणात पहिल्या डावात शतक आणि दुसऱ्या डावात अर्धशतक करणारा तो पहिलाच खेळाडू ठरला आहे.
तसेच गेल्या 50 वर्षांत पदार्पणाच्या कसोटीमध्ये हिंदुस्थानकडून खेळताना दोन्ही डावात 50 धावांचा आकडा पार करणाराही तो पहिला खेळाडू ठरला आहे. याआधी हिंदुस्थानचे महान फलंदाज सुनील गावस्कर यांनी पदार्पणाच्या लढतीत दोन्ही डावात अर्धशतक ठोकले होते. गावस्कर यांनी वेस्ट इंडीजविरुद्ध आपला पदार्पणाचा कसोटी सामना खेळला होता. यात त्यांनी पहिल्या डावात 65 आणि दुसऱ्या डावात 67 धावांची खेळी केली होती. हा इतिहासाची पुनरावृत्ती श्रेयस अय्यर याने केली असून एक पाऊल पुढे जात पहिल्या डावात शतक आणि दुसऱ्या डावात अर्धशतक ठोकले.

पदार्पणात सर्वाधिक धावा चोपणारा तिसरा खेळाडू
श्रेयस अय्यर याने पदार्पणाच्या कसोटीत दोन्ही डावात मिळून 170 धावा केल्या. यासह त्याने लाला अमरनाथ यांचा विक्म मोडला. लाला अमरनाथ यांनी पदार्पणाच्या कसोटीत 156 धावा केल्या होत्या. तसेच हिंदुस्थानकडून पदार्पणाच्या कसोटीत सर्वाधिक धावा चोपणाऱ्यांच्या यादीत अय्यरने तिसरा क्रमांक पटकावला आहे. यात पहिल्या स्थानावर 187 धावांसह शिखर धवन आणि दुसऱ्या स्थानावर 177 धावांसह रोहित शर्मा आहे.

जगातील 16 वा खेळाडू
पदार्पणाच्या कसोटीत पहिल्या डावात शतक आणि दुसऱ्या डावात शतकी खेळी करणारा अय्यर 16 वा खेळाडू आहे. याआधी केएस रणजीतसिंहजी, जॉर्ज गन, हरबर्ट कोलिंस, पॉल गिब्स, लॉरेन्स रोव, रोडने रेडमंड, गॉर्डन ग्रीनिज, अजहर महमूद, लू विसेंट, स्कॉट स्टॅरिस, यासिर हमीद, एंड्रयू स्ट्रॉस, एलिस्टर कुक, उमर अकमल आणि फाफ डुप्लेसीस यांनीही अशी कामगिरी केली आहे.