सातारा :  गेल्या आठादिवसापूर्वी वाढे फाटा येथे फायर करत धारदार शस्त्राने गळा चिरलेल्या अमित भोसले यांच्या खून प्रकरणात शुक्रवारी काही संशयितांना पकडण्यात आले. लवकरच नेमक्या घटनेचे गूढ उकलले जाणार असून सूत्रधार कोण याकडे जिल्ह्याचे लक्ष लागले आहे. दरम्यान, यामध्ये काही अल्पवयीन मुलांचा समावेश असल्याची धक्कादायक माहिती समोर येत आहे. अमित भोसले या वाहने खरेदी विक्री करणाऱ्या व्यवसायिकाचा निर्घृण पणे खून करण्यात आला. खुनाची घटना मध्यरात्री घडली असून त्यावेळी अमित याची मैत्रीण सोबत होती. तालुका पोलिसांनी घटनास्थळी धाव घेऊन पाहणी करत महिलेला ताब्यात घेतले. मात्र मारेकरी हल्ल्यानंतर पसार झाले व नेमके हे कृत्य कोणी केले याची माहिती समोर येण्यास अडथळा आला. गेली आठ दिवस पोलिसांनी तपासासाठी जंगजंग पछाडले होते. मात्र पोलिसांना यश येत नव्हते. शुक्रवारी मात्र अमित भोसले यांच्या खून प्रकरणातील संशयित मुंबई, गोवा येथे असल्याची माहिती पोलिसांना मिळाली. त्यानुसार छापा टाकून संशयितांना ताब्यात घेतले. त्यांच्याकडे कसून चौकशी सुरू आहे.