सुरत : गुजरात निवडणुकीबाबत आम आदमी पक्ष मुख्यमंत्रिपदाचा चेहरा कोणाला बनवणार याकडे सर्वांच्या नजरा खिळल्या होत्या. याबाबत आपचे सर्वेसर्वा आणि दिल्लीचे मुख्यमंत्री अरविंद केजरीवाल यांनी मोठी घोषणा केली आहे. अरविंद केजरीवाल यांनी सुरत येथे पत्रकार परिषदेत सांगितले की, 'जो आमचा मुख्यमंत्री उमेदवार असेल तोच गुजरातचा पुढचा मुख्यमंत्री असेल, त्यामुळे आज आम्ही जनतेला विचारतो की तुमचा मुख्यमंत्री कोण असावा हे तुम्हीच सांगा'. जनतेचे मत जाणून घेण्यासाठी आपकडून क्रमांकही जारी केला आहे. तसेच लोक एसएमएस किंवा व्हॉट्सअॅप संदेश पाठवू शकतात किंवा व्हॉइस संदेश देखील पाठवू शकतात आणि मुख्यमंत्री पदाच्या उमेदवाराची निवड ईमेलद्वारे करू शकणार आहेत.

केजरीवाल म्हणाले की, 'लोकांना बदल हवा आहे आणि महागाई आणि बेरोजगारीपासून दिलासा हवा आहे. या लोकांनी 1 वर्षापूर्वी मुख्यमंत्री बदलले, आधी विजय रुपाणी साहेब होते, त्यांना बदलून भूपेंद्र पटेल साहेबांना का आणले? याचा अर्थ विजय रुपाणी यांच्यात काही गडबड होती का? त्याआधी विजय रुपाणी साहेबांना आणल्यावर जनतेला विचारले नाही आणि दिल्लीतून बसवायचे ठरवले. लोकशाहीत मुख्यमंत्री कोण होणार हे जनता ठरवते. तुम्ही ना 2016 ला विचारले, ना 2021 मध्ये. आम आदमी पक्षात आम्ही हे करत नाही, तुम्हाला मुख्यमंत्री कोण करायचे आहे हे जनतेला विचारून ठरवतो'.

यापुढे ते म्हणाले की, तुम्हाला आठवत असेल की, पंजाबमध्ये आम्ही मुख्यमंत्री कोण व्हावे, असे जनतेला विचारले होते, त्यानंतर सर्वांनी भगवंत मान साहेबांचे नाव प्रचंड बहुमताने घेतले, त्यानंतर जनतेच्या इच्छेनुसार आम्ही भगवंत मान यांच्या नावाची घोषणा केली होती. आता गुजरातमध्ये आम आदमी पक्षाचे सरकार येणार आहे. अशा परिस्थितीत आमचा मुख्यमंत्री जो उमेदवार असेल तोच गुजरातचा पुढचा मुख्यमंत्री असेल, म्हणून आज आम्ही जनतेला विचारतो की तुमचा मुख्यमंत्री कोण असावा ते सांगा. हा क्रमांक 3 नोव्हेंबरला संध्याकाळी 5 वाजेपर्यंत कार्यरत राहील आणि त्यानंतर 4 नोव्हेंबरला जो काही निकाल लागेल, तो गुजरातच्या जनतेला आपला पुढचा मुख्यमंत्री कोणाला बनवायचा आहे, हे ते जनतेसमोर ठेवतील.