सातारा : मराठा आंदोलनाचे नेते मनोज जरांगे पाटील यांनी आज साताऱ्यात जाऊन उदयनराजे भोसले यांची भेट घेतली. यावेळी उदयनराजेंनी जरांगेंना तलवार देऊन त्यांचे स्वागत केले. तसेच त्यांना कानमंत्र दिला. माध्यमाशी बोलताना ते म्हणाले की, समाजावर अन्याय झाला आहे. त्यामुळे मनोज जरांगे आंदोलन करत आहेत.

आज जी मानसिकता झाली आहे, ती सर्वांची मानसिकता झाली आहे. मेरिटच्या आधारावर लाभ मिळावा असं मला वाटतं. जातीजातीमध्ये कोण तेढ निर्माण करताहेत हे शोधून काढा. महाराजांनी कोणालाही अंतर दिलं नाही. जातनिहाय जनगणना करावी आणि आरक्षण द्यावं, अशी भूमिका उदयनाजेंनी मांडली. आर्थिक निकषावर आरक्षण सर्वांना मिळतं. मला यावर बोलायचं नाही, नाहीतर खूप काही बोललो असतो. प्रश्न सोडवणार नसाल तर जगायचं कसं? जनगणना झाल्याशिवाय मार्ग निघू शकणार नाही. प्रत्येकाला जगायचा आणि चांगलं शिक्षण घेण्याचा अधिकार आहे.

जातीपातीचं राजकारण सोडून द्या. महाराजांचे विचार आचरणात आणा, असंही ते म्हणाले, कोणाला पाडायचं आहे ते पाडा. मी तर निवडणूक लढवणार नाही. पण, जातीवरुन फूट पाडू नका. देशाचे तुकडे करु नका. नाहीतर देशाची वाट लागेल, अशी हात जोडून विनंती उदयनराजे यांनी केली. यावेळी मनोज जरांगे पाटील यांनी देखील प्रतिक्रिया दिली. ते म्हणाले की, महाराजांचा आशिर्वाद घेतला. त्यांनी दिलेला कानमंत्र कुणाला सांगणार नाही आणि तो सांगायचाही नसतो.