सातारा : सातारा शहरासह पश्चिम भागात शुक्रवार दुपारपासून हलका व मध्यम स्वरूपाच्या पावसाने हजेरी लावली आहे. महाबळेश्वर, पाचगणी, जोर, जावळी, कास पठार परिसरात सलग दुसऱ्या दिवशीही पावसाची नोंद झाली. सातारा शहरासह आसपासच्या उपनगरात पाऊस पडत होता.

जिल्ह्यात दडी मारुन बसलेल्या पावसाला अचानक सुरूवात झाल्याने शेतकऱ्यांनी समाधान व्यक्त केले. शुक्रवार पासून रिमझिम स्वरुपात पाऊस पडत होता. वाई तालुक्यातील पाचवड, भुईंज, बोपर्डी येथे जोरदार पाऊस झाला. खटाव व माण च्या दुष्काळी भागात काही ठिकाणी परतीचा पाऊस सुरु आहे. या पावसाने पिकांना जीवदान दिल्याचे शेतकरी बोलत आहेत.

महाबळेश्वर २८ (५३१६) मिमी २२२.४४९ इंच, जोर १५ मिमी (५५४५)पावसाची नोंद झाली आहे. सध्या सर्वत्र ढगाळ वातावरण असून हवेत गारवा आहे. दरवर्षीप्रमाणे गणपतीत पुढील पाच दिवसात मुसळधार पावसाचा अंदाज शेतकरी व्यक्त करत आहेत.