कराड : शहरात रोजच्यापेक्षा आज थंडीचा कडाका जास्तच होता. बोचरी थंडी अंगाला झोंबतही होती; पण त्‍याची काळजी न करता मराठा समाज बांधवांकडून दिल्‍या जाणाऱ्या घोषणांचा आवाजही घुमत होता. सायंकाळी सातपासूनच सर्वजण छत्रपती शिवाजी महाराज स्टेडियमकडे येत होते. 

तालुक्याच्या कानाकोपऱ्यातून आलेल्‍या मराठा बांधवांमध्ये कमालीची शिस्तही दिसत होती. डोक्यावर भगवी टोपी अन्‌ ओठांवर एक मराठा, लाख मराठा...ची घोषणा स्टेडियमसह आसमंतही दुमदुमून टाकत होती. त्याला निमित्त होते मराठा आरक्षणाच्या मागणीसाठी राज्यभर रान पेटवणाऱ्या मनोज जरांगे- पाटील यांच्या सभेचे.

कराडची सभा उशिरा होणार, याची माहिती असतानाही तालुक्यासहीत खानापूर, कडेगाव तालुक्यांतून आज मराठा बांधव येथे एकत्रित आले होते. दिसेल त्या चौकातून मराठा बांधवांच्या घोषणांचा जणू पाऊस पडत होता. आरक्षण आमच्या हक्काचे... छत्रपती शिवाजी महाराज की जय..., जय जिजाऊ... जय शिवराय... अशा घोषणा देत दत्त चौक, कृष्णा नाका, कार्वे नाका, कोयना पुलाकडून जथ्थेच्या जथ्थे स्‍टेडियमकडे येत होते.

जरांगे-पाटील यांचा मराठा बांधवांशी संवाद साधण्यासाठी तिसऱ्या टप्यातील दौरा होत आहे. त्यापूर्वी ते जयसिंगपूर, कोल्हापूर व इस्लामपूरहून येत आले. त्यानंतर ते कोकणाच्या दौऱ्यावर जात आहेत. छत्रपती शिवाजी स्टेडियममध्‍ये सभेची जोरदार तयारी केली होती. महिला, पुरुषांना बसण्यासाठी स्वतंत्र व्यवस्था, आकर्षक लाइटची व्यवस्था, ठिकठिकाणी लावण्यात आलेले भगवे झेंडे यामुळे चांगलीच वातावरण निर्मिती झाली होती. जरांगे-पाटील यांच्या भाषणापूर्वी स्टेडियममध्‍ये उपस्थित आबालवृद्ध मराठा बांधवांनी जोरदार घोषणाबाजी केली. कडाक्याच्या थंडीतही आबालवृद्ध स्टेडियममध्ये बसून होते. कोणाची काहीच चुळबूळही होत नव्‍हती, हे विशेष.

जरांगे-पाटील उशिरा आले तरीही..!

कितीही वेळ झाला तरीही जरांगे-पाटील यांना ऐकण्याची मानसिकता घेऊन कराडमध्ये आलेल्या मराठा समाजाने थंडीलाही हरवले होते. सभा नियोजित वेळेपेक्षा अधिक वेळाने होणार असल्याची कल्पना असूनही कोणी जागचा हलला नव्हता. सभेसाठी सायंकाळपासून छत्रपती शिवाजी महाराज स्टेडियमवर गर्दी करण्यास सुरुवात केली होती. ती कायम होती.

पोलिसांचा फौजफाटा तैनात

पोलिस उपअधीक्षक अमोल ठाकूर यांच्या नेतृत्वाखाली बंदोबस्त लावण्यात आला होता. त्यासाठी दोन पोलिस निरीक्षक, २३ पोलिस अधिकारी, १८० पोलिस कर्मचारी, होमगार्ड २५, दंगा काबू पथक एक व साध्या वेशातील विविध पोलिसांची पथके बंदोबस्तासाठी तैनात होती. सायंकाळी बाँब शोधक पथकाकडून स्टेज व परिसराची तपासणी करण्यात आली. मराठा समन्वयकांनी पोलिसांच्या मदतीला स्वयंसेवकांची फौज उभी केली होती. मराठा समाजातील तरुणांनी स्वयंसेवक म्हणून कर्तव्य बजावले.