सातारा : सातारा आगारातील एसटी बसला डीबी कदम मार्केटयार्डच्या समोर शॉर्टसर्किटने आग लागली. ही घटना शनिवार, दि. १८ रोजी सकाळी साडेदहा वाजण्याच्या सुमारास घडली. अचानकपणे लागलेल्या आगीमुळे एसटी बसमधील प्रवाशांमध्ये भीतीचे वातावरण निर्माण झाले. पण त्याचवेळी सातारकर त्यांच्या मदतीला धावले अन पुढील अनर्थ टळला.

याबाबत घटनास्थळावरुन समजलेली माहिती अशी, सातारा आगाराची एसटी बस ही पोवईनाका येथून सातारा आगारात सकाळी साडे दहा वाजण्याच्या दरम्यान जात होती. त्याचवेळी एसटी बसच्या इंजीनमधून अचानकपणे धुर सुरु झाल्याने चालकाने गाडी तात्काळ थांबवून सर्व प्रवाशांना उतरण्याचे आवाहन केले. पण या गडबडीत बाहेर पडताना अनेकांची दमछाक झाली. त्याचवेळी सातारकर या प्रवाशांच्या मदतीला धावले अन त्यांनी संकटकालीन मार्ग तसेच खिडीकीतून वयोवृध्दांना बाहेर काढले. त्यामुळे मोठा अनर्थ टळला.

सातारा आगारात अनेक एस. टी. बस या नादुरुस्त असतात. पण तरीही त्या एसटी बसला विविध मार्गावर रवाना करण्यात येत असते. आजच्या या घटनेतून बोध घेवून यापुढे तरी नादुरुस्त एसटी बसबाबत गांभीर्याने घ्यावे, अशी अपेक्षा प्रवाशांमधून व्यक्त होत आहे.