सातारा : सातारा शहराला कास धरणातून होणाऱ्या पाणीपुरवठ्याच्या कासणी, आटाळी येथे मोठ्या प्रमाणात गळती लागल्याने तसेच सांबरवाडी जलशुध्दीकरण केंद्राचे मेन्टेनन्सचे काम गुरुवार करण्यात येणार असल्याने गुरुवार दि.२३ आणि शुक्रवार दि.२४ रोजी 'कास'चा पाणीपुरवठा विस्कळीत होणार असल्याची माहिती सातारा पालिकेचे मुख्याधिकारी अभिजित बापट यांनी प्रसिध्दीपत्रकाव्दारे दिली आहे.

पत्रकात, कास धरण उदभव योजनेतून नागरिकांना पाणीपुरवठा केला जातो. गळीत काढणे आणि जलशुध्दीकरण केंद्राच्या मेन्टेनन्सच्या कामामुळे गुरुवार दि. २३ रोजी सातारा शहरातील सायंकाळी सत्रातील कास माध्यमातील पोळ वस्ती, संत कबीर सोसायटी तसेच डोंगराळ भागातील बालाजीनगर, कांबळेवस्ती, जांभळेवाडा या परिसरातील तसेच कात्रेवाडा टाकी माध्यमातील सायंकाळ सत्रातील होणारा पाणीपुरवठा होऊ शकणार नाही.

तसेच शुक्रवार दि.२४ रोजी कास माध्यमातील सकाळ सत्रातील पॉवर हाऊस येऊन होणारा यादोगोपाळ पेठ, मंगळवार पेठ या भागातील नागरिकांना तसेच कात्रेवाडा टाकी, गुरुकुल टाकी, व्यंकटपुरा टाकी, भैरोबा टाकी, कोटेश्वर टाकी या टाक्यांच्या माध्यमातून वितरण होणाऱ्या भागातील नागरिकांना पाणीपुरवठा होऊ शकणार नाही. तरी कास धरण उदभव योजनेतून ज्या भागात पाणीपुरवठा केला जातो, त्या भागातील सर्व नागरिकांनी पिण्याच्या पाण्याचा वापर काटकसरीने करुन नगरपरिषदेस सहकार्य करावे असे आवाहन नगरपालिकेतर्फे करण्यात आले आहे.