सातारा : शेतकऱ्यांची आर्थिक उन्नती साधण्यामध्ये विकास सेवा सोसायट्यां चा मोलाचा वाटा आहे. सभासद- शेतकऱ्यांना आर्थिक आधार देण्याचे काम सोसायट्यांच्या माध्यमातून होत असते. जिहे विकास सेवा सोसायटीने सभासदांना ९ टक्के डिव्हिडंट दिला असून या सोसायटीचे कार्य उल्लेखनीय आहे, असे गौरवोद्गार आ. श्रीमंत छ. शिवेंद्रसिंहराजे भोसले यांनी काढले.

जिहे ता. सातारा येथील विकास सेवा सोसायटीने सभासदांना ९ टक्के डिव्हिडंट दिला असून सभासदांना त्याचे वाटप करण्याचा शुभारंभ आ. शिवेंद्रसिंहराजे यांच्या हस्ते प्रातिनिधिक स्वरूपात करण्यात आला. याप्रसंगी आ. शिवेंद्रसिंहराजे बोलत होते. यावेळी तालुका खरेदी विक्री संघाचे चेअरमन दिलीपराव फडतरे, सोसायटीचे चेअरमन संजय फडतरे, व्हा. चेअरमन सुनीता फडतरे, धनजी फडतरे, विलास फडतरे, बाळासाहेब फडतरे, जयवंत फडतरे, मंगला देशमुख, काकासाहेब फडतरे, सयाजी फडतरे, वसंत कणसे, अरविंद फडतरे, सचिव दादासाहेब कणसे यांच्यासह सभासद उपस्थित होते. आ. शिवेंद्रसिंहराजे म्हणाले, जिहे सोसायटीने सभासदांना जिल्हा बँकेच्या विविध कर्ज योजनांचा लाभ दिला आहे. सभासद- शेकऱ्यांना आर्थिक सक्षम करण्यासाठी सोसायटीच्या संचालक मंडळाने प्राधान्य द्यावे. सभासद- शेतकरी आणि सोसायटीच्या विकासासाठी आपण सर्वोतोपरी सहकार्य करू, असे आ. शिवेंद्रसिंहराजे यावेळी म्हणाले.