सातारा : सातारा जिल्ह्यातील साहित्य, सांस्कृतिक व सामाजिक चळवळीतील अग्रगण्य मानल्या जाणाऱ्या गुंफण अकादमीच्या सहभागातून बिहारची राजधानी पटना येथे मंगळवारी (दि. २१) बहुभाषिक कवी संमेलनाचे आयोजन करण्यात आले आहे. गुंफण अकादमी (महाराष्ट्र), साहित्यलेणी प्रतिष्ठान (गोवा) व बिहार हिंदी साहित्य संमेलन (पटना) यांच्या संयुक्त विद्यमाने पूर्वाश्रमीच्या पाटलीपुत्र तर आजच्या पटना शहरातील हिंदी भवनमध्ये मंगळवारी दुपारी तीन वाजता हे संमेलन आयोजित केले आहे.

बिहार हिंदी साहित्य संमेलनचे अध्यक्ष अनिल सुलख, डॉ. प्रेमचंद पांडे, ज्येष्ठ पर्यावरण तज्ञ व पटना विद्यापीठातील प्रा. डॉ. नागेंद्रनाथ मेहता, गुंफण अकादमीचे अध्यक्ष डॉ. बसवेश्वर चेणगे, गोव्यातून कवी प्रकाश क्षीरसागर, चित्रा क्षीरसागर, दीपा मिरिंगकर, अपूर्वा ग्रामोपाध्ये, रजनी रायकर यांच्यासह बिहारमधील अनेक मान्यवर या संमेलनात सहभागी होणार आहेत.

गुंफण अकादमीच्या वतीने गेली पंचवीस वर्षे महाराष्ट्रासह गोवा व सीमा भागात वाचन संस्कृती रुजवण्यासाठी साहित्य संमेलनांसह विविध साहित्यिक उपक्रम राबवले जातात. आता बिहारमध्येही बहुभाषिक कवी संमेलनाच्या आयोजनात सहभागी होत अकादमीने साहित्य क्षेत्रात सातारचा नावलौकिक वाढवला आहे. याबद्दल विविध क्षेत्रातील मान्यवरांनी अकादमीचे कौतुक केले आहे.