सातारा : माढा लोकसभा मतदारसंघातील प्रलंबित विकासात्मक कामे लवकरच मार्गी लागतील, असे आश्वासन भारतीय जनता पक्षाचे केंद्रीय अध्यक्ष जे. पी. नड्डा यांनी दिले. 
माढा लोकसभा मतदार संघाचे खा. रणजितसिंह नाईक-निंबाळकर यांनी माढा लोकसभा मतदारसंघातील विविध विकास कामाच्या संदर्भामध्ये जे. पी. नड्डा यांची दिल्ली तेथे भेट घेतली. त्यावेळी नड्डा बोलत होते.
माढा लोकसभा मतदार संघातील प्रलंबित विकास कामांबाबत केंद्रीय स्तरावरून लवकरात लवकर प्रश्न सुटावेत यासाठी खा. रणजितसिंह ना. निंबाळकर यांनी जे. पी. नड्डा यांची भेट घेतली. यावेळी नीरा- देवधर, भीमा स्थैरिकरण, फलटण - पंढरपूर रेल्वेच्या प्रश्नासंबंधी व येत्या बजेटमध्ये त्यावर निधी प्राप्त होण्यासंदर्भात, फलटण व पंढरपूर येथील विमानतळाबाबत सविस्तर चर्चा झाल्याचे खा. रणजितसिंह नाईक-निंबाळकर यांनी सांगितले.
माढा लोकसभा मतदारसंघांतील बेरोजगार युवकांच्या हाताला काम मिळण्यासाठी फलटण व म्हसवड येथील कॅरिडोर एमआयडीसी बाबतही यावेळी चर्चा करण्यात आली. केंद्रीय स्तरावर विविध विभागाचे केंद्रीय मंत्री यांच्या बरोबर व्यापक बैठक लवकरच घेऊन हे प्रश्न सोडवले जातील असे आश्वासन अध्यक्ष जे पी नड्डा यांनी खासदार रणजीतसिंह नाईक निंबाळकर यांना दिले आहे.
भारतीय जनता पक्षाचे केंद्रीय संघटन महामंत्री बी एल संतोष यांचीही खा. रणजीतसिंह नाईक निंबाळकर यांनी भेट घेतली व माढा मतदारसंघातील पक्ष संघटना व राजकीय विषयावर सखोल चर्चा केली. माढा, सातारा व सोलापूर जिल्ह्यातील बुथ रचना, बूथ सशक्तिकरण अभियान, सेवा पंधरवडा, या विषयावर चर्चा करण्यात आली.