सातारा : गणेश आगमन मिरवणूकांचे सोहळ्याला रविवारपासून प्रारंभ झाला आहे. बुधवार पेठेतल्या शिवतेज गणेशोत्सव मंडळ आणि मंगळवार पेठेतल्या जय महाराष्ट्र गणेशात्सव मंडळांच्या मिरवणूका डीजेच्या वाद्यात काढण्यात आल्या. या आगमन मिरवणूकांमुळे वाहतूक कोंडीची समस्या होवू नये, म्हणून सातारा शहर वाहतूक शाखा कार्यतत्पर होती. परंतु रविवार हा सुट्टीचा दिवस त्यात सातारकर खरेदी निमित्ताने बाजारपेठेमध्ये सायंकाळी येतात. त्यामुळे आगमन मिरवणूकांचा त्रास सातारकरांना सहन करावा लागला.
गतवर्षीपासून साताऱ्यात गणपती बाप्पांच्या आगमन सोहळयांना एक वेगळेच महत्व येवू लागले आहे. गतवर्षी याच आगमन सोहळ्यामुळे गणेशोत्सव मंडळांचे कार्यकर्ते विरुद्ध व्यापारी असा संघर्ष चिघळला गेला होता. गणेशोत्सव मंडळांच्या आगमन मिरवणूकांमुळे व्यापाऱ्यांच्या व्यवसायावर परिणाम होत असल्याने व्यापाऱ्यांनी निवेदन पोलीस अधीक्षकांना गतवर्षी दिले होते. ही बाब समजताच गणेशोत्सव मंडळाच्या कार्यकर्त्यांनी थेट व्यापाऱ्यांच्या विरोधात बहिष्काराचे हत्यार उपसले होते. त्यामुळे व्यापाऱ्यांनी तक्रारीची उपसलेली तलवार म्यान केली होती.
पुन्हा आगमन मिरवणूका कशा असाव्यात, काय नियमावली असावी याच दृष्टीने मंडईच्या राजाच्या मंडपात बैठक पार पडली होती. त्यानंतर त्या वादावर पडदा पडला होता, असा गतवर्षीचा इतिहास असताना याही वर्षी आगमन मिरवणूक सोहळ्याचा शुभारंभ रविवार सायंकाळी सातारा शहरात झाला असून शहरात त्यानिमित्ताने एका डीजेवाल्याचा डीजे दिवसभर राजवाडा बसस्थानकात उभा होता. त्या डीजे मशिनच्या बरोबर लाईटची मशिन उभी होती. या उभ्या असलेल्या मशिनमुळे दिवसभर एसटी स्थानकात बसेस लावण्याची समस्या झाली होती. सायंकाळी उशिरा आगमन मिरवणूक सोहळा सुरु झाला. त्यात रविवार हा साताऱ्याचा बाजाराचा दिवस. बाजाराच्या दिवशी सातारकर हे खरेदीनिमित्ताने सायंकाळचे बाहेर पडतात. खरेदी केल्यानंतर चौपाटीवर खाद्यपदार्थावर ताव मारुन ते घरी जातात. परंतु आगमन मिरवणूका निघाल्यामुळे अनेक सातारकरांची त्रेधा झाली होती. सायंकाळच्या सुमारास राजवाड्याकडे जाणारे व येणारे हे या मिरवणूंकामुळे अन्य मार्गाचा वापर करत होते.
दरम्यान, कोणताही अनुचित प्रकार घडू नये, याकरता शाहुपूरी पोलीस ठाण्याचे पोलीस निरीक्षक सचिन म्हेत्रे यांच्या पथक डोळ्यात तेल घालून काम करत होते. तर सातारा शहर वाहतूक शाखेचे कर्मचारी वाहतूकीची कोंडी होवू नये यासाठी पोलीस निरीक्षक अभिजित यादव यांच्या मार्गदर्शनाखाली काम करताना दिसत होते. आगमन मिरवणूकांमध्ये बुधवार नाका येथील शिवतेज मंडळाची मिरवणूका राजवाडा, मोती चौक, मारवाडी गल्ली, कमानी हौद अशी काढण्यात आली. तर जय महाराष्ट्र गणेशोत्सव मंडळ मंगळवार पेठेची मिरवणूक राजवाडा, गोलबागेला वळसा मारुन गोल मारुती मंदिर, समर्थ मंदिर अशी काढण्यात आली.

श्रीमंत व्यापारी मंडळाची आगमन मिरवणूक १५ ऑगस्टला
सातारा शहरातील व्यापारी मंडळाचा आगमन सोहळा दि. १५ ऑगस्ट रोजी आयोजित करण्यात आलेला आहे. आगमन मिरवणुकीत गणपतीच्या मागे भव्यदिव्य नेत्रदीपक डेकोरेशन करण्यात येणार आहे. शिव-पार्वती विवाहाचा ४0 कलाकारांचा लाईव्ह शो साकारण्यात येणार आहे. त्याचबरोबर शिव-पार्वती लग्नाची वरात दाखवण्यात येणार आहे. हा सोहळा राजवाडा ते ५0१ पाटी दरम्यान काढण्यात येणार असून श्रीमंत व्यापारी मंडळा जवळ २५0 लीड लाईटचा जुना मोटार स्टॅण्ड ते ५0१ पाटी येथे स्टेज शो आयोजित करण्यात आलेला आहे. त्याचबरोबर मिरवणूकीत शिवरुद्राक्ष वाद्य पथक कराड, क्रांती मंडळ नाशिक बाजा सातारा, शिंगवाले, आबदारकी, सनई चौघडा, घोड्यांवरुन छ. शिवाजीमहाराजांचा जिवंत देखावा, छ. शिवाजी महाराजांचा पुतळा व भाऊसाहेब रंगारी, लोकमान्य टिळक यांच्या प्रतिमेची मिरवणूक, फटाक्यांची आतिषबाजी, संस्कार भारतीचा रांगोळी शो, स्मोक, कोल्ड फायर, पेपर ब्लास्ट शो, त्याचबरोबर कार्यकर्ते व महिलांचा पारंपारिक वेशभूषेत सहभाग असणार आहे, अशी माहिती मंडळाच्या कार्यकर्त्याच्यावतीने देण्यात आली.