सातारा : शेअर मार्केटमधून चांगला परतावा मिळवून देतो, असे सांगत प्रमोद पाटील (रा. कराड) याने 122 जणांची कोट्यवधी रुपयांची फसवणूक केली असून तात्काळ त्याच्यावर गुन्हा दाखल व्हावा. अन्यथा, सामुहिक पध्दतीने आत्मदहन करणार असल्याचा इशारा देण्यात आला आहे. दरम्यान, गुंतवणूकदारांनी सातार्‍यात घेतलेल्या पत्रकार परिषदेत याबाबतची माहिती दिली.
अल्लाउद्दीन तांबोळी, हीना मोटा यांच्यासह बर्‍याच गुंतवणूकदारांनी फसवणूकीबाबतची माहिती दिली. 
या फसवणुकीसंदर्भात अल्लाउद्दीन तांबोळी म्हणाले, प्रमोद पाटील याच्यासोबत ओळख झाल्यानंतर त्यांनी शेअर मार्केटमध्ये पैसे गुंतवण्याचा सल्ला दिला. आमच्याकडून वेगवेगळ्या दिवशी, ऑनलाइन पद्धतीने व्यवसाय कामासाठी म्हणून आणि मदत म्हणून कराड येथील प्रमोद रमेश पाटील यांनी पैसे घेतले होते. त्या बदल्यात त्यांनी नोटरी आणि त्यांच्या नावाचे चेक सुद्धा दिले होते. त्यानुसार सुरुवातीला काही रक्कम चांगल्या परताव्याने मिळाल्याने तांबोळी यांनी आणखी 10 लाख रुपये पाटील याच्याकडे गुंतवले. सुरुवातीचे दोन ते तीन महिने चांगला परतावा मिळाल्यानंतर चौथ्या महिन्यात मात्र खंड पडला. यावरुन तांबोळी यांनी पाठपुरावा करण्यास सुरुवात केली असता पाटील याने आणखी काही कालावधीची मागणी केली. नोटरीची मुदत संपल्यानंतर पाटील यांना पैसे मागितले असता त्यांनी पैसे देण्यास टाळाटाळ केली. मी महाराष्ट्रातील मोठ्या राजकारण्यांना ओळखतो. तुम्ही माझे काहीच वाकडे करू शकत नाही. तुम्हाला काय करायचे ते करा. तुमचे पैसे देणार नसल्याच्या धमक्या वेळोवेळी पाटील देत होता. याबाबत आम्ही यापूर्वी कराड शहर पोलीस ठाणे, सातारा जिल्हा पोलीस अधीक्षक कार्यालय, जिल्हाधिकारी कार्यालय यांच्याशी पत्रव्यवहार केले आहेत. मात्र कराड पोलिसांकडून आम्हाला म्हणावे तसे सहकार्य झाले नाही. ते कायम पाटील याचीच बाजू घेत होते. त्यामुळे यामध्ये काही आर्थिक देवाण-घेवाण तर झाली नाही ना, अशी शंका यावेळी त्यांनी उपस्थित केली.
वेळोवेळी पाठपुरावा करुनही गुंतवलेली रक्कम व परतावा काहीच मिळत नसल्याने तक्रारदार तांबोळी यांनी अधिक माहिती घेतली असता पाटील याने अनेक लोकांची फसवणूक केल्याचे समोर आले. त्यानुसार सुमारे 122 तक्रारदार असल्याचे समोर आले. हे गुंतवणूकदार एकत्र आल्यानंतर त्यांनी सातारा पोलीस मुख्यालय व कराड शहर पोलीस ठाण्यांमध्ये तक्रार अर्ज करुन न्यायाची अपेक्षा केली. मात्र पोलिसांनी अद्यापपर्यंत प्रमोद पाटीलवर गुन्हा दाखल केलेला नाही.
दुसरीकडे संशयित पाटील हा अनेक लोकांना सुसाट फसवत चालला आहे. पाटील हा ऐषोआरामात पुणे येथे वास्तव्य करत आहे. दरम्यान, प्रमोद आता पासपोर्ट काढण्याच्या तयारीत असून लोकांच्या पैशावर त्यांच्या पत्नीचा वाढदिवस हेलिकॉप्टरमध्ये साजरा करत असल्याचा फोटोही त्याने स्टेटसला ठेवला होता. याबाबतचीही माहिती पोलिसांना देण्यात आली. मात्र पोलिसांकडून गुन्हा दाखल केला जात नाही. फसवणूक झालेल्यांमध्ये 1 लाख रुपयांपासून 25 ते 30 लाख रुपये गुंतवलेल्या लोकांचा सहभाग आहे. पैसे दिलेल्याचे पुरावे असताना पोलीस सहकार्य करत नसल्याने लवकरच सामुहिक आत्मदहन आंदोलन करणार असल्याचा इशारा यावेळी देण्यात आला आहे.
या पत्रकार परिषदेला आर्थिक फसवणूक झालेले बरेच लोक उपस्थित होते.