सातारा : सातारा येथील वस्तू सेवाभवनातील दोन राज्य कर निरीक्षकांना लाचलुचपत प्रतिबंधक विभागाच्या पथकाने सापळा रचून पकडले त्यांना 20 हजाराची लाच घेताना रंगेहाथ पकडण्यात आले आहे रोहन सतीश देवकर (रा. देगाव, ता. वाई) व अक्षय मोहन फडतरे (रा.  देगाव ,ता.  सातारा) अशी या लाचखोर निरीक्षकांची नावे आहेत. 

याबाबत अधिक वृत्त असे, जीएसटी टॅक्समधील टूबी आणि थ्री बी क्लास मधील दंडावरील व्याज माफ करून देण्यासाठी लाच घेतल्याप्रकरणी ही कारवाई करण्यात आली आहे तक्रारदार यांनी 2022 23 रोजी भरलेल्या जीएसटी शीर्षकात काही रकमेचा फरक पडला त्यामुळे त्यांना दंड झाला. या दंडावरील व्याज माफ करून घेण्यासाठी त्यांनी जीएसटी ऑफिस सातारा येथे राज्यकर निरीक्षकांकडे अर्ज केला होता. 

निरीक्षकांनी या कामाच्या संदर्भात त्यांना 30 हजार रुपयांची लाच मागितली होती. तडजोडीअंती 20 हजार रुपये देण्याचे ठरले. तक्रारदाराने लाचलुचपत प्रतिबंधक विभागाचे उपाध्यक्ष राजेश वाघमारे यांच्याकडे तक्रार नोंदवली. त्यानुसार पोलीस निरीक्षक सुनील पाटील, निलेश राजपुरे, गणेश ताटे, निलेश चव्हाण, अजय देशमुख या पथकाने विक्रीकर सेवाभवनाच्या परिसरात सापळा रचला.  देवकर व फडतरे या करनिरीक्षकांना वीस हजाराची लाच घेताना रंगेहाथ पकडले. या प्रकरणी रात्री उशिरापर्यंत सातारा शहर पोलीस ठाण्यात गुन्हा नोंद करण्याची प्रक्रिया सुरू होती.