सातारा : शाहू कला मंदिर येथे महिलेचे मंगळसूत्र हिसकावून पळणार्‍या संशयिताला नागरिकांनी पकडून ठेवले. त्याची झडती घेतली असता त्याच्याकडे मंगळसूत्र आढळून आल्याने त्याच्या विरोधात शाहूपुरी पोलीस ठाण्यामध्ये गुन्हा नोंद करण्यात आला आहे.
याप्रकरणी उदय वासुदेव आपटे वय 67 राहणार जिजामाता कॉलनी शुक्रवार पेठ यांनी फिर्याद दिली आहे.
याबाबत पोलिसांनी दिलेल्या माहितीनुसार, फिर्यादी यांच्या पत्नी उर्मिला व बहीण माधुरी या शाहू कला मंदिर कडे जात असताना मागून येणार्‍या प्रसन्न भरत चव्हाण भरतगाव तालुका सातारा याने माधुरी यांच्या गळ्यातील सोन्याचे मंगळसूत्र ओढून पळून जाण्याचा प्रयत्न केला. माधुरी यांनी आरडाओरडा केल्यामुळे परिसरातील नागरिकांनी चव्हाण याला पकडून त्याची झडती घेतली असता त्याच्याकडे मंगळसूत्र आढळून आले. हा प्रकार दिनांक 10 ऑगस्ट रोजी सव्वा आठच्या दरम्यान घडला. अधिक तपास पोलीस उपनिरीक्षक के.के. गोवेकर करत आहेत.