सातारा : शाहूपुरी पोलिस ठाण्याच्या हद्दीतील तीन जबरी चोरीचे गुन्‍हे उघड करण्यात पोलिसांना यश आले असून पोलिसांनी संशयितांकडून सुमारे २ लाख रुपये किंमतीचा मुद्देमाल जप्‍त केला आहे. दरम्‍यान, संशयित सर्वजण सातारा शहर व सातारा तालुक्‍यातील आहेत. 

अर्थव अरुण माने (वय १९, रा. पाटखळ माथा), शारुख नौशाद खान (वय ३०, रा. सोमवार पेठ, सातारा), अकिब जावेद कासिमसाहब नांदगळकर (वय. ३० रा. निसर्ग कॉलनी, बुधवार पेठ, सातारा) अशी अटक केलेल्‍या संशयितांची नावे आहेत. 

याबाबत अधिक माहिती अशी, शाहुपूरी पोलीस ठाण्याच्या हद्दी्‌त २४ सप्‍टेबर, १२ ऑगस्‍ट व ३१ जुलै रोजी जबरी चोरीचे गुन्‍हे घडले होते. त्‍यानुसार पोलिस ठाण्यात गुन्‍हे दाखल आहेत. यामुळे शाहूपुरी पोलिस संशयित चोरट्यांचा शोध घेत होते. दि. २९ सप्‍टेबर रोजी शाहूपुरी पोलीस ठाण्याच्या गुन्हे प्रकटीकरण (डीबी) शाखेचे पोलीस वाढे फाटा येथील जबरी चोरीच्या गुन्ह्यातील घटनास्थळावर जावून माहिती घेत होते. त्‍यावेळी संबंधित गुन्ह्यातील संशयिताचा शोध घेत असताना तांत्रिक व गोपनीय बातमीदारामार्फत पोलिसांना माहिती मिळाली की संशयित वाढे फाटा येथील परिसरात फिरत आहेत. शाहूपुरी पोलिसांनी पथक तयार करुन तात्‍काळ वाढे फाटा गाठले. त्‍यावेळी दोघेजण पोलिसांना मिळाले. पोलिसांनी दोघांकडे कौशल्‍यपूर्वक तपास केला असता त्‍यांनी जबरी चोरी केल्याची कबुली दिली. 

याच पध्द्‌तीने पोलिस हे पारंगे चौक येथील जबरी चोरीच्या गुन्ह्यातील घटनास्थळावर जावून माहिती घेत होते. त्‍यावेळी तांत्रिक व गोपनीय बातमीदारामार्फत पोलिसांना संशयितांची माहिती मिळाली. पारंगे चौकातील जबरी चोरीतील संशयित बुधवार नाका, सातारा येथे असल्‍याची खात्री पटल्‍यानंतर पोलिसांनी त्‍यांना ताब्यात घेतले. या संशयितांनीही जबरी चोरीची कबुली दिली. 

दरम्‍यान, तिसर्‍या गुन्‍ह्यात चोरीस गेलेला मोबाईल फोनचा आय.एम.ई. आय नंबर वरुन व तांत्रिक माहितीच्या आधारे दोन विधी संघर्ष बालक निष्पन्न करुन त्यांच्याकडून गुन्ह्यातील चोरी झालेला मोबाईल फोन व गुन्हा करतेवेळी वापरण्यात आलेली मोटारसायकल असा एकूण ५३५०० रुपये किमतीचा मुद्देमाल जप्‍त केला. 

अशा प्रकारे या तिन्‍ही गुन्‍ह्यांमध्ये चोरीस गेलेले ७५५०० रुपये किंमतीचे ३ मोबाईल व १२०००० रुपये किमतीची गुन्ह्यात वापरण्यात आलेल्या मोटारसायकल असा एकुण १९५५०० रुपये किमतीचा मुद्देमाल पोलिसांनी जप्‍त केला. 

पोनि राजेंद्र सावंत्रे यांच्या मार्गदर्शनाखाली फौजदार कुमार ढेरे, आय्याज बागवान, पोलिस सुरेश घोडके, मनोज मदने, जोतीराम पवार, निलेश काटकर, अभय साबळे, सचिन पवार, स्वप्निल पवार, सुमित मोरे, संग्राम फडतरे, यांनी कारवाईत सहभाग घेतला.