मसूर : कांबिरवाडी (मसूर, ता.कराड) परिसरात बिबट्याने धुमाकूळ घालावयास सुरुवात केली आहे. बिबट्याने मोठी दहशत निर्माण केली. गावानजीकच्या शिवारात बिबट्याने दोन शेळ्या फस्त केल्याने ग्रामस्थांत घबराट पसरली आहे. वनविभागाने तातडीने पावले उचलत बिबट्याचा बंदोबस्त करावा, अशी मागणी ग्रामस्थांनी केली आहे.

कांबीरवाडी नजीकच्या शिवारात दोन दिवसांपूर्वी जयहिंद म्हाकू पडळकर यांची बिबट्याने शेळी ठार केली. गुरुवारी दुपारी दोन वाजण्याच्या सुमारास युवराज परदेशी यांच्या पत्नी मळवी नावाच्या शिवारात शेळ्या चरावयास गेल्या होत्या. त्यांच्या डोळ्यादेखत बिबट्याने एका शेळीवर झडप टाकून ती ठार केली. बिबट्याने हल्ला केलेला पाहताच त्या ओरडल्या. त्यांच्या ओरडण्याने ग्रामस्थ जमा झाले. तोपर्यंत बिबट्याने धूम ठोकली.

आतापर्यंत बिबट्याचं अस्तित्व आहे का नाही, याबाबत ग्रामस्थांच्यात शंका होती. तर्कवितर्क लढवले जात होते. गुरुवारी कांबीरवाडीत बिबट्याने शेळी चारावयास गेलेल्या महिलेच्या देखतच शेळीवर हल्ला केल्याने बिबट्या परिसरात वावरत असल्याचे निदर्शनास आले आहे. ग्रामस्थ भयभीत झाले आहेत. शेतात कामासाठी जाण्यास घाबरत आहेत.

मसूर परिसरात आधी नव्हता बिबट्याचा वावर

मसूर परिसरात या अगोदर बिबट्याचा वावर नव्हता. आता भक्षाच्या शोधार्थ बिबट्याने या परिसरात पाऊल टाकले आहे. उसाचे क्षेत्र मोठ्या प्रमाणात असल्याने बिबट्या उसात लपण्याची शक्यता आहे. अशी भीती लोकांच्यामध्ये आहे. परिसरात ऊसतोड सुरू आहे. लोकांसह ऊस तोडणी कामगार शेतात जाण्यासाठी घाबरत आहेत. वनविभागाने बिबट्याला पकडण्यासाठी बंदोबस्त करावा, अशी मागणी केली जात आहे.

बिबट्याच्या हल्ल्यात चिमुकल्याचा मृत्यू

यापूर्वी अहमदनगर जिल्ह्यातील राहाता तालुक्यातील चितळी गावात मयूर दत्तात्रय वाघ यांची वस्ती गावापासून तीन किलोमीटर अंतरावर असलेल्या वाकडी रोड काकडाई मंदिराजवळ आहे. सायंकाळी साडेसहा वाजण्याच्या सुमारास अंगणात खेळत असलेला प्रथमेश मयूर वाघ या बालकावर घराशेजारी असलेल्या डाळींबाच्या बागेतून दबा धरून बसलेल्या बिबट्याने झेप घेत क्षणार्धात त्या साडेतीन वर्षांच्या चिमुकल्याला घेऊन धूम ठोकली.