कराड : कराड शहर परिसरात वाघ दिसल्याचे फोटो सोशल मीडियावर व्हायरल झाल्यामुळे नागरिकांमध्ये घबराट उडाली होती. याची दखल घेऊन वनविभागाने केलेल्या तपासणीत ‘एआय’च्या साह्याने वाघाचे फोटो तयार करून व्हायरल केल्याचे निष्पन्न झाले. खोटे फोटो व्हायरल करणाऱ्यांवर पोलिसांनी गुन्हा दाखल करावा, यासाठी सायबर क्राइम ब्रँचला पत्र दिल्याची माहिती कराडचे वनक्षेत्रपाल ललिता पाटील यांनी दिली.

वन अधिकारी ललिता पाटील यांनी दिलेल्या माहितीनुसार, कराड येथील मुजावर कॉलनी परिसरात वाघोबा अवतरल्याचे फोटो सोशल मीडियावर व्हायरल झाल्यामुळे नागरिकांमध्ये भीतीचे वातावरण निर्माण झाले होते. याबाबतची माहिती मिळताच तातडीने दखल घेत वन विभागाच्या कर्मचाऱ्यांनी कसून तपासणी केली. कृत्रिम बुद्धिमत्ता या तंत्रज्ञानाचा वापर करून ओमकार बोबाटे (रा. मुजावर कॉलनी, कराड) याने कराड शहरामधील मुजावर कॉलनी परिसरात वाघाचे अस्तित्व असल्याच्या अफवा गुरुवार, दि. २९ रोजी विविध प्रकारच्या सोशल मीडियावर विशेषतः व्हाॅट्सॲप या प्रसार माध्यमाद्वारे पसरवल्याचे समोर आले आहे. त्यामुळे नागरिकांमध्ये भीतीचे वातावरण निर्माण करण्याचा प्रयत्न केला ही गंभीर बाब आहे.

फोटो व व्हिडीओ तांत्रिक विश्लेषणासाठी सायबर क्राइम विभाग यांच्याकडे 

प्राप्त झालेल्या भ्रमणध्वनी संदेशान्वये संबंधित ठिकाणी जाऊन तेथील सीसीटीव्ही फुटेज तपासले. मात्र, त्या परिसरात वाघाचा वावर असल्याचे दिसून आलेले नाही. तो फोटो व व्हिडीओ तांत्रिक विश्लेषणासाठी पोलिस उपनिरीक्षक सायबर क्राइम विभाग कराड यांच्याकडे पाठविले आहेत, असेही वनक्षेत्रपाल ललिता पाटील यांनी दिलेल्या माहितीत स्पष्ट केले आहे. ही कार्यवाही सातारा उपवनसंरक्षक अमोल सातपुते, सहायक वनसंरक्षक जयश्री जाधव यांच्या मार्गदर्शनाखाली कराड वनक्षेत्रपाल ललिता पाटील, मलकापूर वनपाल आनंद जगताप, वनरक्षक अक्षय पाटील, अभिजीत शेळके यांच्यासह आरआरटी टीमचे अजय महाडिक, रोहित कुलकर्णी यांनी केली.