सातारा : मोबाइल काॅल तसेच समाज माध्यमाद्वारे अश्लील हावभाव करून जिल्ह्यातील एका महिलेचा विनयभंग करण्यात आला. याप्रकरणी सातारा शहर पोलिस ठाण्यात अज्ञाताच्या विरोधात गुन्हा नोंद करण्यात आला आहे. पोलिसांच्या माहितीनुसार, आरोपी संबंधित महिलेच्या मोबाइलवर काॅल करत होता. तसेच व्हिडीओ काॅल करून चेहरा न दाखवता अश्लील हावभाव करत होता. मागील काही दिवस हा प्रकार सुरू होता. त्यामुळे महिलेने पोलिसांत तक्रार दिली. सातारा शहर पोलिसांनी गुन्हा नोंद करून तपास सुरू केला आहे.