सीमाभागातील खानापूर (जि. बेळगाव) येथे सातारा जिल्ह्यातील गुंफण अकादमी व खानापूर येथील शिवस्वराज जनकल्याण प्रतिष्ठान यांच्या संयुक्त विद्यमाने आयोजित साहित्य संमेलनात ज्येष्ठ पत्रकार विलास अध्यापक यांच्या अध्यक्षतेखाली ‘आजच्या पत्रकारितेपुढील आव्हाने’ विषयावरील हा परिसंवाद सर्वांनाच अंतर्मुख व्हायला लावणारा ठरला. परिसंवादात सातारा येथील मुक्त पत्रकार राजीव मुळ्ये, सीमाभागातील पत्रकार प्रसाद प्रभू, वासुदेव चौगुले यांनी आपले विचार मांडले.

आपल्या स्वतंत्र भूमिकेऐवजी मालकांची जी भूमिका असेल त्याप्रमाणे काम करावे लागणे हेही एक आव्हानच आहे. त्याचप्रमाणे पत्रकारितेचा किती वकूब आहे त्यापेक्षाही व्यवसाय किती देईल यावर पत्रकारांचे भवितव्य ठरते आहे. परिणामी बातमीमागची बातमी शोधणारे पत्रकार कमी होत आहेत असे परखड भाष्य प्रसाद प्रभू यांनी यावेळी केले.

सत्ताधार्‍यांविरोधात लिहिणार्‍या पत्रकारांची गळचेपी होत आहे. समाज माध्यमांवर बातमीच्या नावाखाली वाटेल ते खोटे पसरविले जात आहे. अलीकडच्या काळात सत्ताधार्‍यांना प्रश्न विचारायचे सोडून विरोधकांनाच प्रश्न विचारले जात आहेत हे समर्थनीय नाही असे मत विलास अध्यापक यांनी यावेळी व्यक्त केले. याप्रसंगी ज्येष्ठ वकील अरुण सरदेसाई व मराठी सांस्कृतिक प्रतिष्ठानचे अध्यक्ष नारायण कापोलकर प्रमुख पाहुणे म्हणून उपस्थित होते.