सातारा :  संबोधी प्रतिष्ठानच्यावतीने येत्या शुक्रवारपासून पुरोगामी महिलांच्या साहित्यावर नगरवाचनालयाच्या पाठक हॉलमध्ये व्याख्यानमाला सुरू होणार असून त्याची तयारी पूर्ण झाल्याची माहिती अध्यक्ष रमेश इंजे व निमंत्रक दिनकर झिंब्रे यांनी दिली.

थोरांच्या स्मृती व्याख्यानमाला महात्मा फुले स्मृतिदिन ते डॉ. बाबासाहेब आंबेडकर महापरिनिर्वाणदिन या कालावधीत गेल्या ३९ वर्षापासून आयोजित करण्यात येत आहे. यावर्षी ‘मी आणि माझे लेखन : पुरोगामी महिला साहित्यिकांचे विचारमंथन’ या विषयसूत्रावर ही व्याख्यानमाला गुंफली जाणार आहे. त्यामध्ये महाराष्ट्रातील मान्यवर पुरोगामी महिला साहित्यिकांची भाषणे होणार आहेत. नगरवाचनालयाच्या पाठक हाॅलमध्ये ही व्याख्यानमाला दि. २८ नोव्हेंबर ते ५ डिसेंबर या कालावधीत रोज सायंकाळी सहा वाजता होणार आहेत. महात्मा फुले यांना अभिवादन करुन या व्याख्यानालेला प्रारंभ होणार आहे. शुक्रवारी दि. २८ नोव्हेंबरला डॉ. विजया पाटील (कोल्हापूर), शनिवारी दि. २९ नोव्हेंबर डॉ. सुनीता बोर्डे (सांगली), रविवार दि. ३० नोव्हेंबर प्रा. इंदुमती महावीर जोंधळे (पुणे), दि. १ डिसेंबर डॉ. दीपा श्रावस्ती (सांगली), दि. २ डिसेंबर अंजली चिपलकट्टी ( पुणे), दि. ३ डिसेंबर प्रा. वृषाली मगदूम (मुंबई), दि. ४ डिसेंबर कुंदा कांबळे (मायणी), दि. ५ डिसेंबर डॉ. मानसी लाटकर ( सातारा).

भीमाबाई पुरस्काराचे ६ डिसेंबरला वितरण

डॉ. बाबासाहेब आंबेडकर यांच्या महापरिनिर्वाण दिनानिमित्त दि. ६ डिसेंबर रोजी सकाळी दहा वाजता डॉ. आंबेडकर यांच्या पुतळ्यास अभिवादन केले जाणार आहे. यावर्षीचा २७ वा मातोश्री भीमाबाई आंबेडकर पुरस्कार ज्येष्ठ सामाजिक कार्यकर्त्या, शिवाजी विद्यापीठातील विदेशी भाषा विभागाच्या प्रमुख डॉ. मेघा पानसरे (कोल्हापूर) यांना श्रमिक मुक्ती दलाचे नेते डॉ. भारत पाटणकर यांच्या हस्ते विशेष समारंभात पाठक हॉलमध्ये प्रदान करण्यात येणार आहे. या सर्व कार्यक्रमांस उपस्थित राहवे, असे आवाहन संबोधी प्रतिष्ठानचे उपाध्यक्ष प्रा. प्रशांत साळवे, अ‍ॅड. हौसेराव धुमाळ, सहकार्यवाह डॉ. सुवर्णा यादव, कोषाध्यक्ष यशपाल बनसोडे, विश्वस्त डॉ. जयपाल सावंत, अनिल बनसोडे, केशवराव कदम, अशोक कांबळे, प्रकाश गायकवाड व अशोक भोसले यांनी केले आहे.