सातारा : क्रीडा महर्षी साहेबराव पवार यांच्या शतकपूर्ती वर्षानिमित्ताने भारतीय शैली कुस्ती महासंघ यांच्या मान्यतेने राजेश्वर प्रतिष्ठान सातारा यांच्यावतीने सातारा येथे हिंद केसरी स्पर्धेचे दि.20 ते 23 नोव्हेंबर दरम्यान आयोजन करण्यात आले असून या स्पर्धेत 800 मल्ल सहभागी होणार आहेत, अशी माहिती भारतीय शैली कुस्ती महासंघाचे महासचिव गौरव सचदेवा यांनी पत्रकार परिषदेत दिली.

सातारा येथील हॉटेल महाराजा येथे आयोजित करण्यात आलेल्या पत्रकार परिषदेमध्ये र्जुन अवॉर्ड विजेते गयन सिंग, पैलवान बारणे, खोपडे, दीपक पवार, सुधीर पवार आदी उपस्थित होते. 

यावेळी पत्रकारांना संबोधित करताना गौरव सचदेवा म्हणाले, सातारा येथे प्रथमच एवढ्या मोठ्या रक्कमेची हिंद केसरी स्पर्धा आयोजित करण्यात आली आहे. ही स्पर्धा पुरुष आणि महिला अजिंक्य पद अशी आहे. हिंद केसरी गटात 85 किलो ते140 किलो गटात होणार आहे. प्रथम क्रमांकास थार जीप आणि चांदीची गदा, द्वितीय क्रमांकास ट्रॅक्टर, तृतीय क्रमांकास बुलेट, स्प्लेंडर अशी बक्षीसे आहेत. 55, 60, 70, 75, 85 वजनी गटात या स्पर्धा होणार आहेत. त्यासाठी प्रथम क्रमांक दुचाकी, द्वितीय 50 हजार रुपये, तृतीय 20 हजार रुपये. महिला गटात 65 किलो ते 90 किलो गटात होणार असून प्रथम क्रमांकास अल्टो, द्वितीय क्रमांकास मोपेड, तृतीय क्रमांकास 50 हजार रुपये, तसेच 48, 52, 56, 62 किलो वजनी गटात प्रथम क्रमांकास मोपेड, द्वितीय 50 हजार, तृतीय 20 हजार रुपये बक्षीस ठेवण्यात आले आहे. 

या स्पर्धेसाठी 26 राज्यांचे पुरुष संघ, महिला संघ, सात सेवा संघ सहभागी होणार आहेत. याचबरोबर भारतीय सेना दल, वायू सेना, बीएसएफ, रेल्वेचे संघ सहभागी होणार आहेत. 500 पुरुष मल्ल आणि 250 महिला मल्ल यांचा या स्पर्धेत सहभाग असून त्यांची राहण्याची, खाण्याची सुविधा करण्यात येणार आहे.  आंतरराष्ट्रीय पातळीवरील कुस्तीपट्टू या स्पर्धेसाठी उपस्थित होणार आहेत, असेही त्यांनी सांगितले.