फलटण : अल्पवयीन मुलीवरील अत्याचार तसेच धमकी प्रकरणी एकाविरोधात फलटण ग्रामीण पोलीस ठाण्यात पोक्सोंतर्गत गुन्हा दाखल करण्यात आला आहे. याबाबत पोलिसांनी दिलेली माहिती अशी, फलटण तालुक्यातील एका गावात राहणारी अल्पवयीन मुलगी त्यांच्या जनावराच्या गोठ्यात एकटी असताना गौरव उर्फ सचिन नितीन खलाटे रा. खुंटे, ता. फलटण हा दुचाकीवरून तेथे आला आणि त्याने त्या अल्पवयीन मुलीवर अत्याचार केले. यानंतर ती पीडित मुलगी बारामती येथे शिक्षण घेत असताना तिला ब्लॅकमेल करून ओमनी गाडीत बळजबरीने बसवून, निर्जन स्थळी नेऊन तिच्यावर अत्याचार केले. तसेच संबंधित प्रकार घरातील लोकांना सांगितला तर तुझ्या वडिलांना ठार मारून टाकीन, अशी दमदाटी केली. यानंतर एक महिन्यापूर्वी संबंधित पीडित मुलीने खलाटे याचा मोबाईल नंबर ब्लॉक केला. म्हणून त्याने बारामती येथे तिच्या महाविद्यालयात जाऊन तिचा मोबाईल हिसकावून घेऊन तो जमिनीवर आपटून मोबाईलचे नुकसान केले. याप्रकरणी खलाटे यांच्या विरोधात फलटण ग्रामीण पोलीस ठाण्यात पोक्सोंतर्गत गुन्हा दाखल करण्यात आला आहे. अधिक तपास सहाय्यक पोलीस निरीक्षक शिंदे करीत आहेत.