सातारा : लोकशाहीच्या उत्सवांमध्ये सातारा जिल्ह्यातील नागरिकांनी शंभर टक्के मतदान करावे, ही मागणी घेऊन अखिल भारतीय विद्यार्थी परिषद सातारा जिल्हा यांचे वतीने जिल्ह्यात ठिकठिकाणी जनजागृती अभियान सुरू आहे. अखिल प्रबोधन मंचाच्या वतीने सातारा जिल्ह्यातील सातशेहून अधिक गावांमध्ये मतदार जनजागृतीचा अभियान राबवण्यात आल्याची माहिती अखिल भारतीय विद्यार्थी परिषदेचे प्रांत मंत्री अनिल ठोंबरे यांनी पत्रकार परिषदेत दिली.

यावेळी सातारा जिल्हा तंत्र शिक्षण विद्यार्थी कार्यप्रमुख विघ्नेश घोरपडे व यशदा टेक्निकल कॅम्पस चे प्रमुख शुभम भिकनर उपस्थित होते.

ठोंबरे पुढे म्हणाले, भारताने आपल्या यशस्वी निवडणूक प्रक्रियेद्वारे जगातील सर्वात मोठ्या लोकशाहीचे यशस्वी प्रदर्शन केले आहे. भारताची बळकट लोकशाही व्यवस्था आणि निवडून आलेले मजबूत सरकार हे यशस्वी लोकशाहीचे उदाहरण आहे. भारतातील मतदारांच्या जागृतीमुळे आणि भारताच्या निवडणूक प्रक्रियेमुळे लोकशाहीने घालून दिलेल्या संविधानात्मक गोष्टी शक्य झाल्या आहेत. मात्र अलीकडच्या काही वर्षांमध्ये मतदानाचा टक्का हा 60 टक्के पेक्षा अधिक जात नाही. त्यामुळे सातारा जिल्ह्यात यंदा अखिल भारतीय विद्यार्थी परिषदेच्या वतीने गावागावांमध्ये प्रबोधन मोहीम राबवण्यात येत असून नागरिकांनी मतदान करावे यासाठी प्रत्यक्ष संपर्क मोहीम राबवण्यात येत आहे.

ही मोहीम सातारा जिल्ह्यातील 700 हून अधिक गावांमध्ये सुरू असून मतदारांपर्यंत जास्तीत जास्त पोहोचण्याचा हा प्रयत्न आहे. लोकशाहीला यशस्वी करण्यामध्ये मतदार राजा मोठी भूमिका पार पाडत असतो. निवडणुकीत मतदान करून जागरूक नागरिक होण्याची कर्तव्य पार पाडूया आणि एक सक्षम मजबूत सरकार बनवूया. याकरिता मतदार राजाने आपल्या मतदान हक्काविषयी जागरूक राहणे गरजेचे आहे, असे आवाहन अनिल ठोंबरे यांनी केले आहे.