सातारा : शहरातील विविध ठिकाणच्या मंडईसह मुख्य बस स्थानकानजीकच्या शेतकऱ्यांच्या मंडईतही कांद्याचा भाव वधारला आहे. यामुळे कांदा खरेदीत गृहिणी आखडता हात घेऊ लागल्या आहेत. दुसरीकडे घाऊक बाजारात कांद्याच्या दराची चढती कमान राहिल्याने किरकोळ खाद्यपदार्थ विक्री करणाऱ्यांपासून हॉटेल व्यावसायिकांनी कांद्याचा समावेश असलेल्या पदार्थांचे तूर्तास दर वाढवले आहेत. काही ठिकाणी तर ताटात कांद्याऐवजी ग्राहकांना कोबी देण्यात येत आहे.

सध्या बाजारात मागणीपेक्षा कांद्याची आवक होत नाही. परिणामी कांद्याचे दर वाढू लागले आहेत. शहरातील किरकोळ बाजारात जुन्या कांद्याचा भाव ८० रुपयांपासून १२० रुपयांपर्यंत पोचला आहे. नवीन कांदा बाजारात आला असला तरी जुन्या कांद्याचा भाव तेजीत राहील, असे चित्र आहे. याबाबत विक्रेत्यांकडून देखील दुजोरा दिला जात आहे. या भाववाढीमुळे एरवीही दोन-तीन किलो कांदा नेणारे ग्राहक आता अर्ध्या किलोवर आल्याचे विक्रेत्यांनी सांगितले.

गोबी मंच्युरियनला मागणी वाढली...

शहरातील विविध ठिकाणी गोबी मंच्युरियन हातगाड्यांवर, बेकरीमध्ये मिळते. गेल्या काही दिवसांपासून सामान्य नागरिकांचा गोबी मंच्युरियन खाण्याकडे कल वाढल्याचे दिसून येत आहे. कांदा भजीचे दर वाढल्याने सर्वसामान्यांनी गोबी मंच्युरियनकडे आपला मोर्चा वळविला आहे. गोबी मंच्युरियनबरोबर युवा वर्गात सँडविचला काही प्रमाणात मागणी वाढली आहे. सँडविचमध्ये कांदा सोडून काकडी, कोबीसह टोमॅटोचा समावेश असतो.

भजीपासून ऑम्लेटवर झाला परिणाम...

कांद्याच्या वाढत्या भावामुळे शहरातील विविध हॉटेलमध्ये कांदा भजी, मिसळ, पावभाजी यासह हातगाडीवर किरकोळ खाद्यपदार्थ विक्री करणाऱ्यांनी भेळ, ऑम्लेट या पदार्थांमध्ये कांदा टाकण्याचे प्रमाण कमी केले आहे. काही ठिकाणी या पदार्थ्यांच्या भावात काहीशी वाढ करण्यात आली आहे. ढाब्यांवर तर ग्राहकांना कांदा देणेच बंद झाल्याचेही चित्र आहे. ज्या ग्राहकांना ताटाबरोबर कांदा हवा असल्यास त्यांच्याकडून जादा दर आकारला जात आहे.