सातारा : राष्ट्रवादी शरदचंद्र पवार गटाचे प्रदेशाध्यक्ष जयंत पाटील यांनी येथील राष्ट्रवादी भावनांमध्ये आठ विधानसभा मतदारसंघाचा आढावा घेतला आणि उपस्थित कार्यकर्त्यांची मनोगते जाणून घेतली. या दौऱ्यामध्ये जयंत पाटील यांनी पत्रकारांशी बोलताना टाळले, मात्र मित्र पक्षांना महाविकास आघाडीच्या उमेदवारांसाठी युती धर्माची निश्चित आठवण केली जाईल असे सूचक वक्तव्य त्यांनी केले. 

यावेळी कोरेगावचे आमदार शशिकांत शिंदे, सरचिटणीस राजकुमार पाटील, काँग्रेसचे सरचिटणीस नरेश देसाई, काँग्रेसचे विराज शिंदे वेगवेगळ्या तालुक्यातील कार्यकर्ते उपस्थित होते सकाळी साडेअकरा वाजल्यापासून जयंत पाटील यांनी साताऱ्यात तळ दिला होता. सातारा, वाई, कराड उत्तर, कराड दक्षिण, मान, कोरेगाव, फलटण या मतदारसंघातील वेगवेगळ्या कार्यकर्त्यांशी त्यांनी सुमारे अर्धा तास मतदारसंघनिहाय चर्चा केली. प्रत्यक्ष प्रचारांमध्ये उमेदवारांना कोणत्या अडचणी येत आहेत, किंवा प्रचार पातळीवर कोणत्या सुविधांचा विस्तार होणे गरजेचे आहे याची त्यांनी कार्यकर्त्यांची चर्चा करून माहिती घेतली. 

नोव्हेंबरच्या दुसऱ्या आठवड्या मध्ये महाविकास आघाडीच्या मोठ्या प्रचार सभा होणार आहेत. राष्ट्रवादी सुप्रीमो शरद पवार यांच्या पश्चिम महाराष्ट्रामध्ये सर्वाधिक 56 सभांचे नियोजन झाले आहे. त्या सभांच्या नियोजनाची सुद्धा तयारीचा आढावा जयंत पाटील यांनी घेतला या संवादा दरम्यान आमदार शशिकांत शिंदे राष्ट्रवादी भवनामध्ये तातडीने दाखल झाले, त्यांनी दहा मिनिटे जयंत पाटील यांच्याशी कमरा बंद चर्चा केली तसेच राष्ट्रवादी जिल्हाध्यक्ष सुनील माने यांच्याशी संवाद साधला.

सुमारे दीड तासाच्या आढाव्यानंतर जयंत पाटील जाण्यासाठी निघाले असता पत्रकारांनी त्यांना वाटेत छेडले व महाविकास आघाडीच्या उमेदवाराला साताऱ्यात प्रचारासाठी घटक पक्षांकडून सहकार्य मिळत नसल्याची तक्रार केली. यावेळी ते म्हणाले महाविकास आघाडीतील तिन्ही घटक पक्ष एकत्र आहेत प्रचारादरम्यान काही किरकोळ संवाद विसंवादाच्या गोष्टी होतात, त्या संदर्भात जिल्हाध्यक्षांना योग्य ती सूचना केली जाईल आणि घटक पक्षाच्या जिल्हाध्यक्षांना सुद्धा याबाबतच्या सूचना केल्या जातील असे ते म्हणाले. राष्ट्रवादीचे नेते दीपक पवार यांनी महाविकास आघाडीच्या उमेदवाराला सहकार्य न करता नोटाला मतदान करण्याची जाहीर भूमिका घेतली. यासंदर्भात जयंत पाटील यांना विचारले असता ते म्हणाले याबाबत जिल्हाध्यक्ष त्यांचीशी चर्चा करतील, पवार यांची नाराजी दूर करण्याचा निश्चित प्रयत्न केला जाईल.