सातारा : गेल्या अनेक वर्षांपासून रखडलेली रक्त घटक स्वतंत्र करण्याची सुविधा सध्या टेक्निकल सुपरवायझरच्या नियुक्तीत अडकली आहे. या नियुक्तीनंतरच दिल्लीतून आवश्यक असलेल्या मंजुरीची प्रक्रिया सुरू होणार आहे. त्यामुळे सर्वसामान्य नागरिकांना सोसावा लागणारा आर्थिक भुर्दंड टाळण्यासाठी आवश्यक पदाची तातडीने नियुक्ती होणे आवश्यक आहे.

रक्तामध्ये लाल रक्तपेशी, प्लाझ्मा व प्लेटलेट असे घटक असतात. वैद्यकीय क्षेत्रातील क्रांतिकारी संशोधनामुळे रक्तातील हे घटक स्वतंत्र करता येणे शक्य झाले आहे. रक्तविघटन प्रक्रियेद्वारे लाल रक्तपेशी, प्लाझ्मा व प्लेटलेट हे तीन घटक वेगवेगळे करून रुग्णाला त्याच्या आवश्यकतेनुसार देणे शक्य झाले आहे. त्यामुळे आवश्यकता नसतानाही संपूर्ण रक्त रुग्णाला द्यावे लागत नाही. रक्तक्षय, किडनी व हृदयविकार, तसेच पॅलेस्मियाच्या रुग्णांना रक्त वाढीसाठी लाल रक्तपेशींची गरज असते. भाजून जखमी झालेल्या, तसेच जलोदराचा आजार असलेल्यांना रक्तातील 'प्लाझ्मा' या घटकाची गरज असते, तर डेंगी व कर्करोगाच्या रुग्णांना 'प्लेटलेट' आवश्यक असतात. त्यांना संपूर्ण रक्त देण्याची गरज नसते. आवश्यक तो घटक दिल्यामुळे रुग्णाच्या प्रकृतीत तातडीने सुधारणा होते. मात्र, ही सुविधा खासगी रक्तपेढींमध्येच उपलब्ध आहे. प्रक्रियेसाठी लागणारे यंत्र व इतर खर्चामुळे रक्त घटकांचा दर संपूर्ण रक्तापेक्षा जास्त असतो. त्यामुळे अनेक रुग्णांना ते घेता येत नाही, तर अनेकांना नाइलाजास्तव हजारो रुपयांचा खर्च सोसावा लागतो.